曾經任職花旗集團嘅資深財資市場人士陳少平（Chordio），原來喺呢個星期一，已經悄悄加盟發鈔行中銀香港（2388），出任司庫部投資主管兼副總經理，即係負責替呢間全港第二大行旗下嘅銀行資金盤進行投資增值。據華華所知，Chordio同埋中銀香港全球市場部總經理戴瑩，會齊齊向該行副總裁王仕雄滙報。
任職花旗逾20年
中銀香港係今屆京奧贊助商，冇耐前佢哋喺本港發行嘅奧運紀念鈔，全城哄動，唔講唔知，原來Chordio正式動筆簽約加盟中銀香港，咁啱都係8月8日，京奧舉行開幕禮當日。
以往經常出鏡見報，講解滙市同息率走勢嘅陳少平，今年年初離開任職超過廿年嘅花旗香港時，職位係該集團財資風險交易部總監。
雖然花旗家陣俾次按危機搞到好頭痕，之不過佢哋曾經係全球第一大行，財資市場發展方面，就更加係銀行界中嘅少林寺，訓練咗唔少專才同開創新產品，Chordio同佢喺花旗時代嘅老細、兼因病請辭中銀香港副總裁嘅陳子政，都係財資業界中嘅佼佼者。