奧運爛Gag？唔好問點解！因為我都唔明點解潮流興爛Gag，講嘅俾人鬧無聊照講，聽嘅鬧人低能照笑，更加唔明點解荷媽10幾年前已經識講爛Gag（劇入面）。《家好月圓》都要加爛Gag做噱頭，最近奧運大熱點可以冇佢份。今次特設「爛Gag奧組委」，搵嚟8個DJ加埋有爛Gag王美譽嘅高皓正，自創17個奧運主題爛Gag，睇吓邊個有創意有諗頭，大家齊齊邊笑邊鬧輕鬆吓，齋吹都可湊奧運熱。
記者：許維雅
攝影：譚盈傑
越爛越鬧越熱
爛Gag大熱唔係得個講，討論區熱爆，溏心荷媽都講埋一份，高皓正主持娛樂直播同Roadshow日講夜講俾人鬧無聊反而上位，足以證明時下年輕人的確愛無聊。DJ都齊齊撐爛Gag，於電台周不時彈個爛Gag出嚟自己忍唔住笑自己爛，加埋皓正合9個人之力，各人用奧運主題隨口噏幾個，我敢肯定討論區好快會Pose。其實根據討論區內嘅爛Gag分析，食字、食諧音、食意思、講完等於無講都係爛Gag嘅一種，大家請細心品嚐。
爛Gag王高皓正
1.奧運足球同跳水項目有同一個招式，係乜？
答：插水。（足球員詐騙被對方球員剷跌稱為插水）
2.點解奧運唔可以食禁藥？
答：因為啲禁藥已經禁咗囉。
（……咁都係爛Gag？）梗係！咁爛仲唔係爛Gag？
萬世巨星主持朱薰
3.所有奧運運動員最想聽到邊個運動員個名？（係一個「祝福」）
答：李小雙。（你小傷）
4.奧運村內所有運動員有咩事都會搵姚明問，點解？
答：因為姚明係高人，有望指點。
5.奧運最殘忍嘅比賽項目係乜？
答：雙人跳水，其實大部份雙人項目都係。（傷人跳水）
萬世巨星主持Donald
6.有邊個成日唔俾姚明剪髮？
答：劉翔。（流長）
7.無綫嘅奧運節目最多成日帶我哋去邊？
答：去廣告。
8.ATV奧運主持顧紀筠將美國水怪史畢茲叫咗做史怪水畢茲。（呢個唔係我作，但我覺得係幾好笑嘅爛Gag。）
萬世巨星主持阿占
9.打邊爐有咩料、落乜嘢淥係同奧運會運動有關？
答：霜降肥牛。（雙槓肥牛）
森美移動陳強
10.劉翔姓劉，李寧姓李，咁奧運姓咩？
答案：姓火。（聖火）
喪DO男Leo
11.北京最希望邊一個國家嘅選手嚟參加奧運比賽？
答案：緬甸。（因為唔使墊（音電）支！免墊！）
新香蕉俱樂部范振鋒
12.天星碼頭要填海，水立方要……
答：田亮。（食「填」音）
13.點解無綫搵方力申做奧運主持？
答：因為佢係金牌歌手。（金牌娛樂事業有限公司）
新香蕉俱樂部阿Ben
14.金牌冠軍郭晶晶教跳水，成班小朋友都想跟佢學，有邊個唔使佢教？
答：阿花。（花式「識」跳水）
15.最多嘢食嘅奧運比賽項目係咩？
答：排球。因為好多叉燒食。（排球旁述雷Sir經常鬼殺咁嘈大叫「食叉燒呀！」）
新香蕉俱樂部阿Bob
16.最近奧運村重金禮聘鄭裕玲去一個部門做主管，係邊個部門呢？
答：圖書館。（佢喺開幕禮一句：「你又大聲啦！」一鳴驚人，包無人敢嘈）
17.楊老師畀分同學仔，乖畀A、曳畀D、蠢畀U，廢畀咩呢？
答：C。因為費比斯（美國飛魚）
街訪
老師、歌星 全城爛Gag
抽問一班年輕人考佢哋爛Gag，要佢哋畀分，發覺原來好唔好笑係其次，夠爛就已經夠好笑。10個有10個日日聽，更大爆講嘅由偶像歌星到老師上堂都照講！
裕美：
「我唔識講，但高皓正真係成日講，我畀親無表情嘅反應佢，佢又笑得好開心喎。我哋呢行真係好多爛Gag王。」
范萱蔚：
「聽到慣晒！成日對住EO2不停亂噏，最鍾意食歌詞，尤其Eric。你越藐佢哋，佢哋就越開心。」
Kyle：
「３號爛Gag你小傷，5分！身邊個個都講爛Gag，連老師都成日講，但成班同學靜晒冇反應。但佢都係想搞吓氣氛輕鬆吓啫。」
小虎妹：
「我鍾意『去廣告』，好好笑！8分！爛Gag其實本身唔好笑，係因為覺得個Gag無聊而好笑。」
Kalan：
「劉翔唔剪髮最爆，7分啦！你估佢唔到咁無聊先好笑。」
香蕉：
「金牌方力申，7分。我都會上網上討論區睇吓輕鬆吓嘅。」
林敏驄先係鼻祖
講玩奧運爛Gag，林敏驄式嘅求其噏可以話係爛Gag王嘅鼻祖，差不多十年前已經於一個亞視搞笑節目，剪輯啲奧運片段，用體育記者賴到正嘅主持身份旁述片段內容，亂噏、食字乜都出齊，又話香港取得六面（淥麵）金牌，笑到人肚痛。版主一年前上載短片上YouTube，已經有超過十萬人瀏覽，勁呀！
http://www.youtube.com/watch?v=pq-3N4iDln8
