賭馬，跑得快就Win，盛裝舞步呢？唔識睇照入場，可惜人人半場唔夠無鞋挽屐走，不過走還走，話晒四年一度仲要自己國家主辦，都係望全民投入奧運啫。港聞、體育、娛樂版都係奧運，副刊呢？不如搵香港馬術代表隊成員麥嘉欣，講馬術比賽小知識，40奧運吹水小八卦，睇完一定唔抽筋──悶到抽筋嗰隻。
記者︰許維雅、黃家欣、蒙為亮
攝影︰陳盛臣、譚盈傑、王文忠、伍慶泉
Profile
香港馬術代表隊成員麥嘉欣（Karen），是香港首位奪得在印度舉行的國際青少年馬術跳欄大賽個人冠軍得主，目前是香港少年馬術會籌委會員，亦是亞洲電視2008年奧運馬術主持人之一。
1.頭耷耷先至好
馬仔扭籮有分加？珍珠都無咁真，扭籮，又或者有節奏地強烈震動臀部肌肉，表示馬仔非常享受比賽，兼運用肌肉得宜。最最最最最搞笑嘅係，賭仔最怕馬仔入閘前頭耷耷，無厘火氣一副唔願跑咁款，等搣飛啦；但喺盛裝舞步規例中，馬仔頭耷耷先好，耷頭等同展現最美麗姿態，會整體加分。
2.老馬先係主角
奧運馬術比賽屬最高級別大賽，規定參賽馬最小7歲，唔通學賭仔話齋，真係老馬先有火？有無火就唔知，不過參賽馬一定要持有國際馬聯認可護照，通過衞生檢疫先可以正式出賽。大前提係馬仔同主人是否合拍，年齡不設上限，即係話今次奧運，老馬先係主角。
3.唔郁要Foul
馬仔天性愛跑，碌葛咁企硬、打死唔郁嘅情況好少見，但喺盛裝舞步規例下，馬匹抗拒唔做動作超過20秒，Sorry，即Foul；喺場地障礙賽，超過45秒都跳唔過下一個障礙，又Sorry，都係同一命運，都要Out。
4.比賽就馬唔就人
奧運馬術賽晨早六點半開波，苦了人捱眼瞓，但馬仔反而越早越精神。點解？因為香港夏天勁潮濕炎熱，安排喺清晨同傍晚比賽，馬仔先有健康身體同穩定情緒專心作賽。其實換個角度諗都好嘅，晨早露天睇比賽，起碼觀眾唔會曬到暈吖。
5.開遮都有罪
睇馬術比賽唔擔得遮，以免形成一片遮海，擋住其他觀眾視線，兼避免甩手把遮吹落場嚇親馬仔，影響比賽進行，呢兩點可以理解，但開遮都有罪喎，又點解呢？因為開遮會發出「蓬」一聲，呢一聲「蓬」都會影響馬匹表現，驚落雨嘅話，唔該乖乖帶備雨褸嘞。
6.拍手要睇時候
搞清楚，睇馬術唔係去紅館捧古巨基場，點精采都好，都應該等選手完成比賽向觀眾敬禮後先拍得掌。仲有，尖叫、大聲喧嘩、吹BB、舞螢光棒、舉牌等等一律禁止；比賽場地內唔准用手電，如有錯犯，保安有權「邀請」你離場。
7.咪漏帶空樽
奧運安檢嚴格，講明唔准帶任何液體入場，所以大家記得帶空水樽，場地有飲水機供觀眾Refill飲用水。馬術比賽有限公司行政總裁林煥光話過，奧馬場地提供嘅飲品以良心成本價發售，所以唔使擔心齋坐兩個鐘頭，滴水不沾渴死雙魚河。
8.白Tee加老牛最穩陣
之前有報道話大Logotee唔准着入場，又唔准集體着同一顏色衣服睇比賽，以免借奧馬免費宣傳。咁最穩陣Dresscode係乜？白Tee加老牛踩多對波鞋！因為着到五顏六色會令馬仔分心，高踭鞋都免問，睇障礙賽成地泥，唔着為妙啦。
9.Pat不離位
大會提議，在場觀眾應盡量避免比賽期間出出入入，嚴禁跑來跑去，因為馬仔見到人跑，會心理上產生危機意識，仲有，原來馬仔非常八卦，觀眾席稍有郁動，都會令馬仔分心，影響發揮水準。
10.學騎馬超重免問
賽馬會屯門公眾騎術學校發言人張小姐表示，拜奧馬熱所賜，不論大人定小朋友，學馬術人數大幅上升。收費方面，每堂馬術約$360，每堂一粒鐘，每月四堂。不過講明先，馬仔要承受成個人重量，超過175磅朋友，死心啦。
（查詢：24613338）
11.睇馬不如買紀念品
首場奧運馬術賽晨早六點半開波，現場直擊，好多人睇唔明盛裝舞步點計分，有人嫌舞步千篇一律，有人寧願去精品店排隊買紀念品，有人大覺瞓。賽事十時完結，九點車站已出現中途離場人潮，賽前大鑼大鼓，可惜無乜市民識得欣賞。
12.馬展無人理
香港歷史博物館同香港藝術館分別舉行「天馬神駿──中國馬藝術和文化」（即日至10月13日）同「馬的故事」（即日至12月28日）展覽，前者展出秦騎士鞍馬俑等逾60件珍品，後者展出陶瓷、青銅、竹刻、中國書畫等40件藝術藏品，撲唔到飛睇盛裝舞步，可以考慮睇呢啲唔郁嘅馬，不過問題係，你有無興趣睇先？
13.催眠英文旁述
馬術比賽不設現場廣播旁述，好彩，九成觀眾醒目帶定收音機，入場後調校到FM106.7MHz，就可以收聽中文旁述。大部份受訪者話中文旁述有助欣賞賽事，學曉甚麼叫「凌空換腳」等馬術專業用語，不過聽英文旁述就慘啲嘞（FM103.2MHz），有觀眾投訴英文旁述語調太平淡，無抑揚頓挫，聽到幾乎瞓着。
14.奧運無波賭
亞運有波賭，奧運足球無得賭？各大討論區怨氣沖天，話間接逼佢哋賭外圍波，有報章估計，有接近700億投注額無端端益咗外圍佬。點解咁大塊肥豬肉都唔食？馬會解釋好荒謬：「歐國盃剛閉幕，奧運馬術8月開鑼，為免分散資源，所以唔開盤。」究竟係無資源開盤定唔夠膽開盤呢？唔明，真係諗唔明，唔係受唔起呀？
15.子珊紅底熱爆YouTube
奧運風吹得狠，吹到徐子珊露紅底。上YouTube搜尋最多人瀏覽奧運片段，居然係「徐子珊露紅底迎奧運@香港全民迎聖火2-5-2008」，點擊率於3個月內有309,021次（截至8月9日中午為止），再數落先係中港台紅星聯合拍攝嘅《北京歡迎你》MTV，子珊一個打低咁多個明星，威啦。
16.ATV威番次
好佩服網友咁好心機，明知無綫同ATV屆屆奧運鬥餐死，幫手比拼兩台播放頻道，比拼乜？計兩台總播放時間，結果ATV以1,300小時勝無綫1,000小時，再比拼兩台主持陣容，ATV有李麗珊同谷德昭，個個網友都話撐ATV，今次終於贏番次喇。
（ http://www5.discuss.com.hk/viewthread.php?tid=7790571&highlight=%B6%F8%B9B）
17.劉翔愛鬥地主
欄王劉翔，一時人參餐一時「遊戲論」，花邊新聞多到痹。離開跑道，佢日常有乜娛樂？原來佢勁着迷鬥地主。奧運最後衝刺期間，劉翔連MSN、QQ都無得玩，唯一保留嘅娛樂只有睇碟同鬥地主，最好笑係劉翔鍾意搶做地主，同運動場上一樣好勝。
（ http://2008.qq.com/a/20080318/000043.htm）
18.上網睇奧運無人知
奧運盛事，兩大台固然鬥得你死我活，連無份播嘅NOW都日日整個《奧運中華》特輯。有線呢？同樣全力催谷，不過電視無得睇，大搞獨家網上直播。雖然無乜人知，但總算開創先河，感覺隨時隨地，返工時間偷懶好選擇，畫面質素不俗㗎，係衰在無得放大啫。
19.老土薯嘜鞋上位
奧運熱帶起運動熱，運動用品舖發大達？No喎，波鞋街「允記」搞購物折扣擦擦卡慶奧運，成績同往年暑假差唔多，店員阿昀：「多咗人買Mizuno呢類牌子嘅Indoor運動鞋，羽毛球同乒乓球客路多咗。」薯嘜Mizuno擺明實用抵着型，今次靠奧運上位贏番次。
（查詢：新青年23880512）
20.高清睇奧運都難
連李力持都呼籲買高清睇奧運，心郁郁換電視係時候落手，同老婆入紙申請有藉口。可能趕搭尾班車嘅人太多，好多牌子已經斷晒貨，中原售貨員表示：「多咗人因為奧運買高清，但數目未算太誇張，𠵱家剩番SONY，買部40吋夠睇啦。」
（查詢：中原電器27719822）
