八月七日係農曆七月初七，乃牛郎會織女之日，算係中國情人節，傳統上叫做七巧節，但時至今日，已冇人記得，若非有朋友提起京奧開幕時間係二○○八年八月八日晚上八時零八分兼農曆七月初八，左丁山都唔會醒起八月七日就係七月初七。是日也，政府突然在下午公佈廣播處長人選。中午時份，竟然有記者打電話嚟問：「左生，你是否處長人選？」嚇得我，連忙否認，絕無其事。
到咗下午謎底揭曉，廣播處長就是六十五歲嘅黃華麒。以此年紀，做公僕老早退休咗，但現以合約應聘，政府用人唯才，既然不須處長具備學位，當然亦唔計較年紀老少，取其經驗豐富也。記者又來問：「左先生識唔識黃華麒，有何評價？」左丁山反問佢識唔識黃處長，佢話：「根據資料，黃生係一九七四年離開港台，嗰陣我都未出世！」佢唔講，左丁山唔會諗到代溝問題，譬如港台吳志森自認「森叔」，但呢位阿叔喺一九七四年仲係讀緊中三或者中四（按：吳志森係一九八二年中大新亞生物系畢業生，與梁鳳儀副局長同屆），與黃處長有一段距離。
黃處長論資歷，有資格到極；政府宣佈之日，左丁山恰巧在「喜萬年」碰到老早離開港台嘅股神L。股神L與張大姐、黃華麒在七十年代初同是港台明日之星，同被視為具處長潛質，後來黃生首先離開，股神L隔十年左右又走埋，張大姐在港台一枝獨秀。真想唔到，張大姐退休七年後，竟然會由黃先生出任廣播處長。對左丁山嚟講，曾與新任處長有數面之緣，並無甚麼交情，佢雖然係老港台，弊在老到台內冇人認識，與佢同期進入港台者，早已退休五至十年，所以黃處長對今天之廣播界生態是否熟悉，與年輕一代記者、編輯、監製與DJ嘅思想面貌是否能充份溝通，會係佢之最大考驗。畀啲時間佢啦，𠵱家就話佢唔掂，甚不公平，等佢表演三幾招之後，再講嘢亦不算遲。政府搞妥廣播處長人選後，下一步應該係公佈黃應士委員會報告之諮詢文件，搞得嚟，到另一個公共廣播機構成立之時，黃處長已係古稀之年，唔會過渡咯。