前日彌敦道一場五級火，造成四死五十幾人受傷，事件突如其來，加上有兩名英勇消防員救人時殉職，呢啲生死瞬間嘅畫面喺電視台全日播放，好多本來開開心心睇緊奧運嘅人，都變得心情沉重。呢個全城悲慟嘅時刻，唔少有心人都喺網上留言，表達慰問同敬意，不過煲呔作為特區政府最高負責人，竟然全無動靜，唔通變咗隱形特首？
五級火雖然已事隔一日，噚日仍然有市民去現場獻花，發揚大家都係社會一分子、冇分你我嘅關懷，係大愛嘅表現。市民大眾係咁，特區政府又有乜嘢反應，到𠵱家只係得唐唐以署理特首身份，前日去醫院，探望火災中嘅傷者，又對死者表示難過同話會向家人提供協助。
前晚返香港後玩隱形
八方起初以為，署理特首出現都算係咁喇，咁煲呔又去咗邊？原來佢上京睇奧運開幕，由7號至10號期間，交由唐唐擔任署理特首。好多城中富豪當京奧係一個大派對，專登包起貴賓廂熱鬧一番，煲呔自認係「要做好呢份工」嘅打工仔，冇理由要行開四日咁耐，特首辦都話，煲呔係私人活動，只係知佢前晚至返香港，喺北京搞乜東東一概唔知。相比之下，澳門特首鏵哥睇完開幕第二日已經帶隊返澳門。
煲呔經常做離岸特首，上個月佢又外訪，帶住一班富商去東北考察，返港時因利乘便，落機即刻去咗巡視機場嘅奧馬安排，跟住第二日又親身去沙田同雙魚河實地睇進展，好明顯，奧馬係阿爺開到聲指令佢親自過問，自然要做嘢畀中央睇。至於阿爺冇吩咐嘅嘢，好似前晚落機好應該去探吓消防員或者傷者咁，但佢冇咁做。
本港消防局噚日為殉職同僚下半旗，特區政府點做仲未知，不過八方聽聞，𠵱家仲係以奧馬為先，白事未有定案，但港府就定咗下星期會喺香港仔嘅珍寶海鮮舫大排筵席，款待各國奧馬代表隊喎。
煲呔曾經好感性話「流緊香港人嘅血，飲緊香港人嘅水」。不過八方最怕係佢仍然沉醉喺鳥巢睇奧運開幕，為盛世祖國實現百年奧運夢想而奮亢高呼「中國加油」嘅一刻，而忘記咗我哋班香港市民。
mailto:[email protected]