京奧順利開幕，賽程歷時兩周，呢段期間，股民心情忐忑不安，怕啥？怕有大件事發生也。上周五，奧運開幕前幾小時，A股就反高潮而大跌，港股亦無辜辜被拖低，股民心情既興奮又憂心，好複雜，但願夢想成真，中國健兒奪多金，奧運又圓滿閉幕，平安大吉，大步檻過。
利福國際（1212）年初高位近25元，早前回落到10元關口反彈，上周五收11.90元，走勢已見回穩，現價比高位下跌近半，已可低吸。
中港兩地消費增長強勁，利福大為受惠。07年（12月年結），營業額31億元，升20.5%，獲利10.24億元，升38.4%，每股盈利60.22仙，末期息13.5仙，全年派24仙（經1拆2調整），往績PE19.7倍，息率2厘。
集團經營百貨業務，在中港有3間分店，分別係銅鑼灣崇光、尖沙嘴崇光同上海久光。今年計劃在內地再開3店，分別位於天津、大連及蘇州；前二者面積較小，只有3萬多平方米，會打造成概念店；蘇州的舖面面積則有16.8萬平方米，會以年輕的客路為對象。另現時正就收購聯洲（048）進行最後的資料審批。
中科係短炒對象
大行多看好利福前景，摩通維持其「增持」評級，目標價18.50元；中銀國際更樂觀，維持其「優於大市」評級，目標價23.52元，報告對利福的收購持樂觀看法，因透過利福的網絡，有助強化聯洲的內地銷售。
利福係中長線投資對象，現水平上車，揸半年，有機會見15元，穩穩陣陣，賺兩成。
想短炒，亦有對象，而且仲係大平賣。一間幾乎係現金嘅公司已經少有，而股價更只得淨值一半嘅，更有如鳳毛麟角，呢間公司就係中國科技（985）。
中科去年原本部署轉型，已集資成18億元，但因中央限制外資入股而告吹，現時手頭上有淨現金及等值物約21億元，每股淨值16仙，中科上周五收8仙，大折讓50%。
中科冇轉型，業務又單純，好似「一張白紙」，相信已有唔少人覬覦，中科上周尾突見異動，股價由低位反彈逾40%，好戲會好快上演，可昅實。