近排揸車有無覺得後尾枕凉浸浸？有無無端端起雞皮？有？咁你就要小心喇，因為你個冷氣校得太凍喇，好易傷風感冒㗎。就算你唔覺已經踏入農曆七月，不過喺街見咁多人燒衣，都知中國鬼節就快到，詭異氣氛令人硬係覺得有怪事發生，《轆Book》都係時候講鬼古應節，第一日出場係動漫Maggie，大家要有心理準備，個古仔真係不可思議到極點。
Maggie話佢自己無揸車，亦啋啋啋未試過搭車撞見陰間朋友，不過佢聽過一個的士司機講嘅靈異事件──話說阿司機有晚開夜更，凌晨四點喺觀塘工業區上客，一個頭髮長長着白色衫嘅女仔，一上車就陰聲細氣話去華人永遠墳場，阿司機都心知不妙，但為免估錯被告拒載，都要開車，惟有開快啲。點知，開車唔夠三分鐘，司機望一望倒後鏡，咦？唔見咗個女仔喎，到停燈位，司機鼓起爆燈勇氣擰轉頭，一望，真係鬼影都無隻，登時心都離埋，決定揸車落裕民坊，話晒係旺區人氣重啲。喺佢掉頭一刻，把陰聲細氣女仔聲又出現，仲喺佢耳邊講：「我明明話返屋企，點解你車我返轉頭……」吓？屋企？司機驚起上嚟一扭軚，慘，攬山，最後傷重不治──講完。
的士司機七月賴嘢事件來來去都係咁，最不可思議嘅係，司機明明死咗，邊個同Maggie講呢個古仔呢？「哦……係另一位司機講我聽嘅。」咁邊個講畀「另一個司機」聽呢？「呀……嘻嘻。」聽到呢一聲嘻嘻，我真係由個心裏面寒出嚟再寒番入去呀。
文：嘴嚼爺