奧運開鑼，唔少國際巨企嘅CEO雲集北京睇奧運，當中包括已經退休嘅蓋茨（BillGates）。佢睇奧運之餘仲順道嚟香港，出席微軟亞洲研究院成立10周年典禮，而且會發表題為「為未來10年的發明」（InnovatingfortheNextDecade）嘅演說。
睇奧馬與特首會面
蓋茨聽晚8點會喺灣仔會展向獲邀嘅2000名嘉賓發表演說，之後同香港大學校長徐立之、中文大學校長劉遵義，同科技大學校長朱經武喺呢個議題上交換意見。
早前有報道話，蓋茨會出席北京奧運開幕典禮，然後嚟香港睇奧運馬術比賽，亦有機會同特首曾蔭權會面。華華為咗收料，走去搵微軟香港總經理林向陽。雖然林向陽話唔係好清楚蓋茨喺香港嘅行程，但就話呢次係蓋茨唔做微軟主席之後，首次出席微軟嘅公開活動，所以非常有代表性。佢仲爆料，話蓋茨將會同大家講「魔術軟件的威力」（MagicofSoftware）。
北京監管嚴揀香港
蓋茨搞魔術？林向陽解釋，軟件就好似魔術一樣，睇唔到摸唔到，但重要性一啲都唔低過硬件，可以加強機械同機械、人同人，仲有互聯網之間嘅溝通。
至於點解微軟會喺香港搞位於北京間亞洲研究院嘅成立10周年典禮，有話係因為北京奧運期間對大型集會活動有嚴格監管，所以揀喺香港舉行。
其實香港喺軟件應用方面一啲都唔輸蝕，林向陽仲話，香港喺軟件應用開發成就突出，反映港人靈活反應同具創意嘅優勢。佢舉例澳門永利賭場，面對荷官人手短缺，所以就研發咗一套賭枱上嘅流程應用系統軟件，慳番唔少培訓荷官嘅時間。
佢又話，香港大學嘅研發能力達到世界一流水平，所以喺微軟亞洲研究院10個研發中心當中，有兩間就係同香港嘅科大、中大合作，喺人體識別技術上表現突出。
電郵：mailto:[email protected]