單睇毛孟靜有MissMo之稱，就知道佢幾咁鍾意教人，尤其係佢講到嘞嘞聲嘅英文。佢過往嘅學生都係以小朋友為主，石硤尾、油麻地同大角嘴佢都試過開班授徒，就連網上都有唔少學生fans，引證教學質素都有一定水準。
九西參選人各有各忙
MissMo自爆最近竟然多咗個「學生」，就係社民連嘅長毛。佢話長毛有日突然喺facebook問佢，官商勾結嘅英文係咩？呢個問題當然難唔倒MissMo，即時答話係"collusionbetweenbusinessmenandgovernment"。雖然接觸好多小學生，但MissMo話唔會叫佢哋助選，費事要迫佢哋表態。好彩公民黨內有小朋友嘅黨員唔少，令到MissMo噚日得到一班公民黨N世代幫手站台。
同區九西其他參選人都各有各忙，馮檢基坐住架宣傳車周街去、田二少就去旺角社區會堂探望受火災影響嘅災民，阿涂當然繼續做地區嘢，難怪噚日由「香港人網」搞嘅九西論壇反應比較冷淡，得毓民同MissMo為現場帶嚟一啲火花。