一字排開五隻的福娃，看來有點日本特攝戰隊，原來面世至今已有一千日，呢段日子，福娃的經歷似足過港男，赤裸裸的任你摸任你批評，由奧運到地震傳聞，可謂含辛茹苦、歷盡滄桑。不喜歡福娃的你大可視佢為奧運是非精，但如果你想做奧運達人，來到呢個Moment福娃你一定要知。仍然未搞清邊隻係歡歡、迎迎的你，40條問題之中，當然先熟讀以下福娃知識題。
21.香港福娃產品全靠自由行
香港人乜都炒，奧運鈔票炒到上天，但福娃真係炒唔熱。香港奧運特許零售店店員阿Ben表示，香港人對福娃產品不算狂熱，通常都只係同福娃產品拍吓照算數，真係要數，當中最熱賣的是福娃陶瓷及工藝品，售價由$250之$369.5不等，更有內地旅客一次買下十多套福娃「奧運之城」陶瓷，作為送禮之用。所以都話呢，最撐呢五隻嘢的，始終要靠自由行。
查詢：北京奧運特許商品售賣店（21968989）
22.民間自創福娃六神合體
喺奧運呢個Moment，中國人民的創意，要爆啦！
福娃標誌有註冊專利，屬奧組委財產，要買專利先可以生產福娃產品，你以為咁就會阻止到民間發揮創意？互聯網上有眾多惡搞福娃，笑死無命賠，大陸更有人利用福娃設計一個類似六神合體的「福星鎖核金剛」機械人玩具，放在淘寶網上拍賣，機械人高23厘米，由五隻可變身成獨立福娃的機械人合併而成，索價只人民幣五十大元，網民大讚創意極高，計我話，有創意又「限量」，珍藏諗得過！
23.福娃×adidas網上賣
民間智慧話：翻版業最知道市場要乜！
睇見呢對鞋，如果話福娃唔賣得，我想問福娃Crossoveradidas會唔會好賣得？
記者於網上拍賣搵到呢對adidas福娃Superstar，醜唔醜樣見仁見智（大把交叉版波鞋，肉酸到死都炒幾千蚊啦），冒充係adidas出品，於網上當真品牌球鞋發售又真係離譜咗啲。經公關證實，adidas未有生產任何福娃波鞋，難怪波鞋叫價$360都乏人問津。
24.福娃網上變性感美少女
有潮人第一眼見到今屆吉祥物福娃，反應都係揦口揦面：「咦……咁娘！」其實歷屆吉祥物都冇邊隻特別討好，更往往慘變惡搞對象。今屆就有人於網上令福娃長大，搖身一變成為性感美少女，5個動漫Feel的靚女福娃，畫工不俗，造型神似。愛國之士當然強烈譴責，又話似春樓小姐、又話係日本人惡作的陰謀論。其實用吉祥物來搞搞震係有失尊重，不過呢個都係民間的奧運傳統，畫家想借題博出位，笑吓啦中國人！
http://www.gogo.com.hk/bbs/viewthread.php?tid=151
25.29萬一隻福娃故宮收藏
福娃有人讚有人彈，國內愛國死士眾多，撐奧運自然撐到行，懶理其他人點踩5隻福娃仔，繼續死搶爛搶有收藏價值的限量版福娃紀念品，身價最高的福娃更索價廿九萬如此天價。只有2008套的中國玉福娃用上5種色玉雕塑5隻福娃，加埋一支白色和田玉玉如意襯托，0001號更成為故宮博物院收藏的唯一奧運藝術品，認真巴閉。
http://www.news365.com.cn/jc/200802/t20080212_1754070_2.htm
26.張藝謀嫌棄福娃
身為北京奧運開幕禮總導演張藝謀竟然同福娃鬧不和，事緣由張大導一手策劃、統籌的開幕禮雖然極盡華麗，全球人都讚不絕口，但今屆奧運吉祥5隻福娃，在整個長達三小時的開幕儀式中，竟然失蹤，連半秒出鏡率都無！開幕儀式一完就即刻有眼利網友上Yahoo知識庫提出疑問，若然不是張大導嫌棄福娃，莫非係福娃們要學劉翔，留力應付奧運賽事？
27.五福娃中，紅色最受歡迎
在五福娃中，以代表奧運聖火，紅噹噹的歡歡最受歡迎。公仔多次被搶購一空，大抵因為紅色代表大吉大利，如意吉祥，但同「娃」唔同命，藍色的貝貝則成為滯銷的一隻。大多數顧客都認為貝貝外貌「騎呢」，不夠討好，遠遠不及人見人愛的歡歡。
28.海關清場老翻娃絕迹
香港有老翻天堂的「美譽」，成年名牌、兒童卡通公仔等都見怪不怪。記者並非鼓吹大家買老翻，純粹睇吓八卦吓，茶餘飯後講起都幾好笑。但勢估唔到福娃老翻之前多到不得了的花園街、女人街，竟然近日全面局部清場，其他老翻乜都有，偏偏就搵隻福娃都冇。向店員查詢，反應驚青鬼祟不停話：「冇冇冇！」海關做事的確識時務，邊啲時間要掃邊啲貨，真係心繫家國！
29.國內攞金牌最少獲190萬
台上一秒鐘，台下十年功，咁辛苦苦練，到真係拎到個奧運金牌的話，國家有何獎賞先？
根據國內媒體報道，中國體育總局雖然現在尚未透露京奧具體的獎勵金額，但已確定肯定會超過上屆。對比悉尼奧運會時冠軍獎金15萬元的標準，按每屆遞增5萬元計算，北京奧運冠軍至少能獲得25萬元的獎金。此外霍英東基金會也從1984年開始，為每位中國隊的金牌得主頒發一公斤黃金以及8萬美元（64港元）獎金，誰說金不換!再加上廣告代言等收入，中國選手每獲一塊金牌，隨時可獲高達190萬元人民幣！
30.奧運Game唔夠砌
個個都想奧運分一杯羮，電玩遊戲又如何，世嘉就剛推出了唯一國際奧委會認可的《北京奧運2008》，可惜反應不算熱烈。GC店長阿偉表示體育競技遊戲一向有穩定客路，呢排會多啲人玩，過咗奧運又少番，不過今次隻奧運Game反應一般，反而早前的Mario&Sonic更受歡迎！
查詢：GCCompany（27204162）
31.國歌也有京奧特別版
2008北京奧運將會使用經過重新編曲的「慢版」《義勇軍進行曲》，由北京交響樂團負責演奏錄製，經過1年多的工夫，在上月10日全部完成。樂團團長譚利華表示今屆使用的中國國歌《義勇軍進行曲》曲長50秒，比原版長2秒，放慢了點，不容易察覺，卻能顯出宏大氣勢。奧運版國歌在音樂配器方面更加精細，更充份完美的表達了國歌旋律、意境。
32.奧運鈔入貨係時候
入貨係時候！早排搶餐死，打晒交，踏入奧運月，奧運鈔炒價竟然不升反跌，金匯錢幣老闆AK：「早排大陸有班人喺度直接接貨，攞上大陸，佢哋走咗後炒價明顯回落。」AK教路，想鈔票保值就要揀簡單號碼，而一啲號碼相同、字頭唔同的一對對鈔票都十分罕有，因為大部份鈔票已經被人收回大陸，想搵一對相同要用好多心機，並非易事。
查詢：金匯錢幣買賣（好旺角購物中心地下15號）
33.紋身慶奧運
有人狂搶紀念鈔、郵票，有人唔識都入場睇，潮人呢？紋身絕對係最有型。早前在沙灘就見到有人紋了「京奧」兩字於頸背上，十分搶眼。鋒刺青師傅MAN透露：今次奧運紋身唔算熱，但他的徒弟KK就剛幫人紋了一個5環圖案作紀念。不過大家千祈唔好貪得意人紋你又紋，唔係真心為奧運，到時後悔就唔好。
查詢：鋒刺青（34278666）
34.東港城最大高清電視
屋企裝唔切高清電視？唔使頭痕，在東港城有全港室內最大高清超大電視屏幕，每天直播奧運賽事，高清加巨型屏幕大大增加現場感，唔知係咪連郭晶晶臉上的暗瘡都可以睇到呢？現場設有逾百個座位，全晚不停直播各電視台奧運節目，每晚8時舉行奧運直播Party，備有小食同汽水，同大量福娃精品贈送，可以邊睇邊食邊拎﹗
35.拎住奧運票尾有着數
睇完奧運馬術，千祈唔好丟張飛尾，除有紀念價值，原來仲有着數拎！奧運期間拎住奧運馬術賽事門票票尾，去wtcmore世貿中心或者上水廣場，毋須消費即可得到限量版福娃太陽帽一頂，仲有一本總值超過$500的獨家購物優惠小冊子，真係有得睇有得拎﹗
36.金牌選手早餐有得食
運動員餐單其實無乜花巧，萬變不離水果、麥皮，不過能與劉翔嘆同一份早餐，大概可以沾染點活力！apm商場根據劉翔、羽毛球選手王晨以及泳將菲比斯的餐單，製作三款健康醒神早餐，分別以五穀類為主的劉翔A餐；高纖的王晨B餐及菲比斯的營養C餐。由即日至8月24日於apm商場內消費，憑即日機印發票，加$10就可以享用一份參照奧運金牌的星級早晨健康餐。
時間︰7am-9pm
地點︰apm大堂
37.奧運書籍銷情佳
估唔到一個京奧，連港人的閱讀風氣都帶動埋，三聯書店表示以往有關奧運的書籍只有一、兩本，但至去年底突然有大量奧運書湧現市場，更大受讀者歡迎，銷量比平時好以倍計。奧運馬術賽在香港舉行，書局內有關馬術的書籍亦大賣，其中由本港馬術運動員麥嘉欣撰寫的《人．馬．情》，拆解種種有關馬術比賽的事項，她與馬相處的故事，可說是市民入場前必刨的馬術天書。
38.劉長春，唔係劉翔
劉長春，唔係劉翔喎。劉長春是第一個參加奧運的中國人，電影《一個人的奧林匹克》記錄短跑選手劉長春於1932年，逃出偽滿洲國，投靠東北大學校長張學良將軍，籌得八千大洋，孤身遠赴美國參加奧運的事迹，過程歷盡艱辛，被鬧漢奸都要啞忍，忍辱負重，真人真事慘過《家好月圓》個荷媽！於8月14日在百老匯電影中心、PalaceAPM及AMC又一城等共十間戲院，均有一場免費場。
39.《Weareready》唔係主題曲
奧運歌曲有萬九幾首，無綫有首連Eason都唱到嘴歪的《光輝的印記》，大陸就有群星大合唱的宣傳歌《北京歡迎你》，仲未計周杰倫、王力宏等人各自搶住呈交奧組委的奧運歌曲。電視日播夜播由金培達作曲、陳少琪填詞的《Weareready》，原來亦只係奧運會倒數一周年的宣傳歌曲。真正的奧運主題曲得一首，就係開幕當日，由音樂總監陳其鋼作曲兼填詞，反高潮的《YouAndMe》。
40.酒吧買奧運怕
球季尚未正式開鑼，家陣整多個奧運，會唔會影響生意？「鳳凰吧II」老闆Bee哥：「好驚啲人趕住返屋企睇奧運，唔落嚟飲酒。」為此，佢推出Cocktail逐Jar嗌Package，左起BlueHawaii、Nothing同SexontheBeach每Jar$128，平時每杯Cocktail約$40，家陣每Jar斟到8杯，「希望吸引到女仔客入場啦。」
地址：尖沙嘴漆咸道南17-19號帝后廣場地庫
