新任廣播處處長寶座終於落入黃華麒手上，雖然黃華麒知名度唔高，為人又低調，但可能呢個係佢嘅賣點喎，唔通真係搵個惹火尤物周融做處長，入晒子彈俾人轟咩。八方聽聞黃華麒個處長位真係得來不易；佢今次成功跑出，認真要多得喺招聘過程中其他潛在對手。
黃華麒曾首輪出局
知情人士同八方爆料，話喺進行第一輪遴選時，當局考慮到港台好多員工都對盛傳熱門人選嘅黃應士「吉叔」有意見，最驚吉叔真係入紙申請入主港台，到時真係唔知請佢好定唔請佢好，就暗地裏set咗一個重要條件，要求人選要喺60歲退休年齡以下，即係吉叔就算申請都一定食白果，等港台中人個心安定啲，但就搞到現年65歲嘅黃華麒亦都冇得入圍。
揀完一輪得個桔，跟住政府無啦啦喺第二次遴選放寬候選人嘅條件，話唔一定要大學畢業同有年齡限制。雖然外界都唔係好信咁做係為咗遷就電台節目主持人周融，但好明顯政府係心有所屬，而且嗰位仁兄一定唔係黃華麒，因為黃華麒係港大畢業生，同政府講嘅學歷要求相差好遠。喺黃華麒打定輸數之時反而爆冷，但點解有咁嘅結果，呢個謎可能連佢自己都未必解得開。