上周五嘅奧運開幕儀式，全球數以億計嘅觀眾睇住電視直播。雖然話舉行開幕式嘅鳥巢可以容納十萬個現場觀眾，但可以手握門票入場嘅尤其係香港人，真係少之又少。港府有一批高官亦應邀上京觀禮，北京有句話叫「不去北京，不知道官小」，入鳥巢之時，佢哋同普通人一樣都要排隊過安檢，入場票仲要自己現兜兜畀錢買。
畀近五千人仔至有飛
八方聽聞，大前晚嘅奧運開幕儀式，唔少人話「好張藝謀」，但亦贏得觀眾唔少掌聲，算係為中國攞到唔少face。特區唔少政界人士同高官都有北上睇開幕，見證住歷史時刻。唔好以為佢哋咁着數有免費show睇，查實佢哋都付出唔少，除咗要扲幾千蚊人仔買飛外，亦要同普通人一樣，排隊等個幾鐘通過嚴格安檢先至進到場，據聞財爺鬍鬚曾、律政司司長黃仁龍，同終審法院首席法官李國能，以及其餘一批以人大、政協身份上京，包括吳光正同田少等人，就乖乖哋排咗好耐隊先入到場，耐性都唔少。港府三司長，惟獨唐唐要做處理特首兼睇實奧馬，要留低喺香港。
大家以為佢哋睇奧運係免費，事實原來唔係。據聞特區一眾獲邀人士都要畀近五千蚊人民幣先有飛，當然呢批飛好多人有錢都未必買到。八方聽聞外國炒開幕禮嘅飛，炒到成五千幾蚊美金至有交易，香港嘅政界中人計落都算有着數。
前晚喺北京返嚟嘅政協田少同八方講，當日佢哋下晝5點由酒店出車、6點去到鳥巢，跟住就要好似普通人咁，用咗個零鐘排隊過安檢，算係好快手。現場睇大show，田少話視覺效果認真一流，見到中國同香港運動員進場仲好感動㖭。故此雖然睇完騷要凌晨兩點幾先返到酒店，佢都唔覺太辛苦。
人大葉國謙亦有北上睇開幕，佢話佢哋過安檢時非常嚴謹，門票仲內置持票人個樣，保安工作做到十足十，由於所有飲品唔帶得入場，口渴或肚餓就惟有入場再去小食亭排隊買，仲要淨係收現金冇得碌卡。好多人一旦做到高位，身邊就會有人幫手做晒所有嘢，搞到即使由基層做起，慢慢都變到好似不知民間疾苦，今次奧運開幕式總算畀番佢哋做平民嘅感覺。
mailto:[email protected]