上個禮拜，金管局總裁任志剛提到，下半年香港經濟增長會差過預期，仲話受次按引發嘅信貸危機拖累，香港自03年沙士後，連續5年經濟快速增長嘅形勢將會中斷。咁即係話，香港嚟緊嘅經濟只可以用一個字形容，就係「差」。其實，之前滙控（005）主席葛霖喺業績發佈會上都有講，雖然實質經濟最終都會喺危機中恢復過嚟，但係轉機出現之前，大家都要捱。
財金要員不約而同咁睇淡嚟緊嘅經濟環境，作為一般散戶，無謂逆天而行，學股壇前輩話齋，家陣最重要係持盈保泰。
衰退時期大師冒起
其實危中有機，歷史中唔少重要嘅經濟學家同學說，都係喺大蕭條、大衰退嘅環境下產生，鑑古知今，以前經濟學大師嘅學說，有好多值得敏妮學習，所以敏妮聽股壇前輩講，開始摷番啲歷史故事睇。
投資須保本兼賺錢
喺熊市大家第一樣諗到嘅應該係價值投資，而講到價值投資，唔可以唔提BenjaminGraham。Graham經歷過1929年美股暴跌、經濟大蕭條，之後喺1934年底完成經典著作《SecurityAnalysis》，裏面提到投資唔係投機，所謂投資係要通過認真分析同研究，係希望投入嘅資金，保本之餘仲有滿意嘅收穫，符合唔到呢個標準嘅，唔可以稱得上投資，只可以話係投機。雖然呢個理論大家隨口都講到，但真正做到嘅就冇乜幾多個。
當然Graham博大精深嘅投資理論，要講都唔輪到敏妮，何況網上亦有唔少關於佢嘅投資理論介紹同研究文章。不過，敏妮想喺呢個市況同大家分享歷史上類似時刻，大師級嘅投資智慧。Graham嘅《SecurityAnalysis》仲有一個「安全入市理論」，明天再講。
http://wanmanli.com/blogs/