轆Book：轉子轉出面　0.1秒大不同

個人偏見，一見甚麼Facelift版即時火起，求其換個包圍又話係新款，新舊對比慘過玩PhotoHunt。MazdaRX-8Facelift版就乖嘞，有全新泵把頭燈、內櫳桶椅裝飾、AUX-in插頭。性能上，牌頭依然係雙轉子引擎，0-100km/h只需6.4秒，快舊版0.1秒，0.1秒做到啲乜？都眨到半次眼㗎，畀錢啦。

文：嘴嚼爺
攝：林栢鈞
模特兒：Fion

八色車身任揀

唔係寸，以Facelift版本嚟講，0-100km/h快0.1秒，確實唔嘢小。同一副雙轉子引擎，231匹，唔知係咪心理作用，又可能Facelift版換上MazdaMade六前速密牙波箱，起步加速真係爽住去。咦？5,000轉就到紅區，唔係我有眼疾嘛？隔籬阿PR先生解畫：「呢個係引擎轉數保護區提示，隨住架車慢慢Run熱，紅區會由5,000到7,000到最盡9,000轉，其實開車行差唔多一分鐘就會跳一級，因為你遲到三個字，我熄車等你咪……」哈，得得得，轉話題吖唔該。
Facelift版有多色選擇，新加SparklingBlack、DiamondGrey同AuroraBlue三色，合共有八隻顏色，不過我始終鍾情紅色。講真，六速手波塞車就嫌煩，但去郊區就玩唔厭，跑車化懸掛設定比較硬淨，內櫳算闊落，起碼我成6呎高都有排未頂頭，咁坐後面阿長腿Fion又點睇？「OK呀。」OK頂定OK唔頂呢？「起碼唔係Dogseat啦。」答得好中肯。落車，話就話係四門四座，但為保持樣辣線條靚，設計屬對開式車門，要先開前門至開到後門，不過Facelift版叻，前座椅背有個推前掣，後座上落都好方便。

減低偈油消耗

Facelift版仲有乜唔同？頭燈明顯拉長咗，用電鍍燈殼更光猛閃令令，車頭泵把線條圓滑咗，左右兩邊入風口加大咗兩倍，廠方話可以將引擎油溫降低6℃咁多，諗起都無咁熱。舊款車尾，無論車身乜色，泵把下方都係黑色一笪，新版就襯番車身顏色，順眼好多，四圈尾燈用LED圍邊，夜晚睇更靚仔，燕子尾喉直徑都加大咗，把聲更好聽。夠皮未？Facelift版其實仲有啲改動係表面睇唔到嘅，轉子引擎一向都被車迷嫌佢燒偈油，即係偈油消耗量好多，但今次供偈油系統由機械式燃油霧化改為E-MOP電子噴嘴，燒偈油情況應該會有改善。
嗱嗱聲影完硬照，我心急又身痕，再開車踩多轉，今次要就攝影師架ClassicMini影行車相，嘩，漫遊清水灣，谷住谷住行慢車，感覺真係唔好受，攝影師影完相，我即刻踩油爆佢一段，話咁快佢連車尾燈都見我唔到，咁先係爽。