全球矚目的08奧運昨晚揭幕！中國隊上屆金牌數目僅次於美國，今次佔盡主場之利，港隊也精英盡出。香港的名人明星，同聲為中國運動員及港隊代表打氣。鄧麗欣（Stephy）寄望中國女排奪金；古巨基力撐欄王劉翔在百一米欄再破世界紀錄；陳豪看好鄭潔雙打機會大增；跳水公主郭晶晶也是金牌大熱，「未來老爺」霍震霆鼓勵她要結合豐富經驗和臨場發揮，為國爭光。
撰文：李全
霍震霆：晶晶壓力唔細
「當然特別關注港隊啦，另外國家隊嘅熱門項目，好似劉翔我都會支持。去到奧運呢個水平，郭晶晶攞過好多次冠軍，技術上當然冇問題，重點係佢有好豐富嘅比賽經驗，主要就睇臨場發揮。因為同一時間有好多強勁嘅對手，呢方面嘅壓力都唔細，同埋希望佢用前輩身份，帶領師妹做到最好。」
Stephy細數女排精英
「中國今年有主場之利，我身為中國人梗係支持中國女排喺奧運奪金，不過都知佢哋有古巴同意大利呢啲勁敵，但只要中國女排可以發揮到一向嘅水準，必定奪金有望。女排嘅成員當中，趙蕊蕊身形高大，馮坤同王麗娜嘅爆炸力又好強，都係隊中精英分子，我好希望佢哋發揮出團隊精神，為國增光。」
陳豪：鄭潔雙打必勝
「我一路有留意鄭潔，覺得佢進步好大，好有前途。佢上得世界賽，功夫一定唔差，但打女單嘅話有好多好強嘅對手，好似塞爾維亞嘅伊娃諾域同美國威廉絲姊妹等。對住啲強勁對手，鄭潔喺體能上會差啲，所以我覺得佢同晏紫打雙打嘅話，可以同拍檔互補不足，攞獎牌機會大啲。」
余文樂：姚明唔好受傷
「中國籃球隊喺奧運度被編埋同美國、西班牙及德國一組，我比較睇好美國隊，始終佢哋喺籃球方面係強項，美國隊又有勒邦占士同拜恩呢啲咁強嘅選手，中國隊要加倍努力先得。希望姚明唔好受傷，加上中國隊有主場之利，我寄望中國隊可以殺入四強。」
古巨基：劉翔欄王冧莊
「我最鍾意睇田徑同跳水，呢兩個項目充份表現出運動員動作上嘅優點。上屆奧運會代表中國參加跨欄嘅劉翔成為欄王，為中國摘金，今屆北京奧運大家都對佢寄予厚望，我當然都對佢充滿信心。越近比賽，我覺得佢嘅狀態會越嚟越好，希望佢今次出賽可以突破自己成績，再破奧運紀錄。」
陳慧琳：李小鵬狀態勇
「喺奧運眾多比賽項目中，體操係其中一項我最感興趣嘅。中國體操隊喺上屆奧運嘅成績雖然未如理想，但係今年再接再厲，李小鵬、程菲同楊威狀態大勇，佢哋可以帶領一啲新秀爭取經驗，今次又有主場之利，我對佢哋充滿信心。」
容祖兒：祝黃金寶捧金
「我好鍾意踩單車練氣，我知道黃金寶今年會代表香港出征08北京奧運單車項目，希望佢到時喺賽道上可以發揮最佳狀態，將其他對手擊敗。其實黃金寶過去喺好多國際賽事都全力以赴，成績唔錯，累積咗好多國際賽事嘅寶貴經驗，我睇好佢今次奧運可以繼李麗珊之後，為香港奪得金牌。」
劉德華：孖寶為港爭光
「我當然支持『乒乓孖寶』李靜同高禮澤，雖然今次北京奧運冇男子雙打，但我覺得冇問題，孖寶無論喺任何情況乜嘢形式，就算要分開進行單打比賽，佢哋都可以打出水準，佢哋兩個嘅心都係冇變，我相信佢哋都係同一條心，希望為香港爭光。雖然佢哋會面對唔少困難同壓力，不過我相信佢哋會全力以赴。」
