北京08奧運前晚終於在一片歡呼聲和璀璨的煙花下揭開序幕，表演項目由內地導演張藝謀悉心打造，幕幕精采，令人讚嘆不已，不少名人明星分別赴京或在電視機前見證祖國這歷史一刻，不無感動。
溫碧霞：創意滿分
整個開幕禮都好有創意，張藝謀安排得好出色，每一幕都有獨特嘅地方，充滿震撼，我都睇到好感動。我最鍾意吊高五環，然後有飛天仙子伴住嘅一幕，精采絕倫。
葛民輝：不枉此行
我排咗三個鐘先入到場，同埋大會啲紀念品好勁，有國旗、奧運旗，仲有福娃鼓，我跟住主席（胡錦濤）轉fing呢啲，如果唔fing周圍啲人會望住。今次不枉我做咗四粒鐘「老臨」。
林嘉欣：凸字震撼
最難忘係啲凸字，初頭以為係電腦效果，之後有人出來揮手，好震撼。
蔡一傑：中國熱潮
噚晚個開幕禮好靚，今次中國人做得好好睇，揚威海外，可以畀外國人知道中國人係好叻，相信會掀起一股中國熱潮。成個開幕禮做得好有層次。
任達華：最愛傘陣
張藝謀呢次嘅安排真係冇得彈，我最鍾意傘陣嗰幕，因為打開把傘就係唔同國籍小朋友嘅笑臉，感覺好warm，可以代表以人為本，同時都帶出奧運和平訊息。
琦琦：小孩動人
我最鍾意小朋友着民族服裝出嚟唱歌，我一聽就眼濕濕，好感動，我覺得張藝謀真係100分。
陳慧琳：小東好嘢
最難忘係李寧吊威吔點聖火，睇完之後，我即刻傳短訊畀程小東，因為嗰啲動作係由小東負責設計，佢好厲害，真係為港人爭光呀！