在這個氣溫高達攝氏35度的炎夏下午，最怕悶熱的王書麒與妻子許秋怡，流着一身汗，帶着兒子王綽木丹（Cody）親子樂，他們一家三口住在元朗獨立屋，地方寬闊環境清幽，不少父母均望子女能遷入名校網，不惜搬屋，但書麒就寧選擇提供良好的居住環境給兒子，也不做名校奴隸。書麒更笑指兒子喜歡看他當年與路家敏演出的《小時候》，對路家敏姐姐更是情有獨鍾。 撰文：陳寶明
王書麒與許秋怡因婚前意外懷孕，在03年結束愛情長跑，在婚禮上二人抱着可愛的兒子王綽木丹一同行禮，兩夫妻與兒子一同分享這大喜日子，轉眼間Cody已5歲，明年9月便升讀小一，為人父母者，那個不想子女入讀名校，不過書麒及秋怡這對父母，卻另有主意。
欲再添兒女
秋怡日前接受訪問時說：「我都會搵學校，不過唔會為咗要讀名校，而搬屋遷就，個仔好鍾意讀書，唔使人逼，佢兩歲返幼兒班，已經識得催我幫佢溫功課，佢考試嘅時候，我以為好簡單啫，幫佢溫書時先發現，嘩，乜啲功課咁深嘅，佢可以坐定定8個鐘讀書，好乖唔扭計，所以我哋諗，既然佢咁鍾意讀書，讀邊間學校都一樣會有好成績，我哋唔會為搵名校而搬屋，因為生活環境對小朋友同樣重要，我哋都諗過搬去九龍區，但諗深一層，有冇呢度咁好環境先，衡量過後，覺得考到邊間咪讀邊間囉！」
難道做父母不想兒子成龍嗎？書麒說：「真係冇咁諗過，我哋只求囝囝開心，將來佢唔一定要賺大錢，唔一定要做專業人士，總之佢一日兩餐自己搞掂，唔使問父母攞錢，唔好係二世祖就得。」其實書麒兩夫婦想再添多個小寶寶，不過由於秋怡有纖體合約在身，起碼要等多一年，書麒笑說：「生出嚟唔知佢好定唔好，呢個投資係一世，我哋唔係啲老來靠仔養嘅人。」兩夫妻更分工合作，全面照顧囝囝的需要，書麒專責兒子的健康及傾聽對象、秋怡則負責照顧兒子的起居飲食。
怕面試輸蝕
眼見囝囝一日一日長大，在書麒心中他就像自己的縮影，因為其子遺傳了他的怕醜性格，書麒笑說：「我細細個拍戲，咪以為我好叻，其實我好怕醜，一見有記者我就匿埋，個仔好似我咁，佢都好怕醜。」在旁的秋怡插嘴說：「佢如果去學校度面試，只得嗰幾分鐘時間，個仔唔知會點反應，佢雖然平時好乖，不過面試時間咁短，啲老師唔知佢平日係點，有啲蝕底㗎。」
童星出身的書麒笑言在32年前，已每月賺得3,000元收入，但他甚反對兒子繼承衣鉢，他說：「有好多嘢唔係自己可以掌握得到，一旦入行好難跳番出去，最好有時間set畀自己。」書麒10歲開始拍戲，記憶最深是《小時候》，最近推出DVD，Cody也是捧場客，書麒笑說：「佢話好鍾意路家敏姐姐，我同佢講路家敏已經係Auntie。」秋怡也笑問兒子，媽咪與路家敏姐姐邊個靚啲？Cody賣口乖說：「兩個都咁靚。」
3歲已懂事
講到乖乖的Cody，秋怡覺得他很孝順，年紀小小已甚懂事，秋怡述憶Cody的公公在他3歲時病逝，秋怡哭得死去活來，兒子竟然懂得拿紙巾為她抹淚說：「媽咪唔好喊，公公喺天堂度好開心㗎！」聽完兒子的安慰說話後，頓時令她開懷了不少！而剛過去的周三正是Cody的5歲生日，秋怡更親自弄了鋪滿藍莓的芝士蛋糕為兒子慶祝，更送了一架單車給他。問到生日願望，今年讀K2，考得全級第三名的Cody說：「希望出年考第一。」
育兒心得：體藝培訓親情更濃
提到暑假，不少父母會安排子女報讀密集式的課外活動，但書麒及秋怡卻只安排兒子上鋼琴班及學恒宇仁龍拳，回想去年秋怡安排囝囝學打非洲鼓，但原來Cody興趣不大，今年難得Cody自己提出學琴及打拳，兩夫妻當然十分尊重兒子的意願。秋怡又表示，Cody自兩歲時已經十分喜歡繪晝，故去年便開始上堂學習，他的畫作如微笑的花、七彩小丑及長頸鹿等均有一定水準。
母子做富貴桔
書麒又表示學校的活動，很多時也有賴父母的參與，秋怡自豪地說：「今年過年Cody要做賀年勞作，我幫手做一棵富貴桔，用棉花同鐵枝，仲有廁紙同米做，我做咗3日3夜，Cody幫手塞棉花同廁紙，我仲要用針線縫埋啲桔，最後得咗全級冠軍，Cody好開心。」兩母子的感情及默契也在互相合作下變得更為濃厚起來。
和諧家庭幸福滿瀉
秋怡經常到內地登台，在多次登台中，令她最難忘的是杭州及上海之行，因為這次是首次一家三口同行之外，還有她的兄嫂及親友，在登台期間其中一天是她生日，大夥兒更為她慶祝，秋怡說：「呢次係第一次帶埋個仔去旅行，咁啱又係放暑假，個仔玩得好開心，書麒搞咗個神秘生日會，喺酒樓度訂咗位食飯，我哋成20幾人，就連上海嘅親戚都嚟埋，佢又安排咗生日蛋糕，同送咗束花畀我。」
秋怡覺得自己很幸運，對很多父母為口奔馳，而未有時間照顧子女，秋怡就說：「我一個月登台十幾場，平時起碼有20日陪個仔，所以我覺得上天對我哋一家人真係好好。」
