香港歷史性舉行奧運，協辦馬術賽事，可惜香港人唔識欣賞馬術，唔少人覺得一場悶劇，部份買咗飛入場嘅都呻笨，早知留喺屋企睇其他項目好過啦。噚日馬術賽開鑼，場內最令人精神一振嘅，可能唔係講求人馬合一嘅賽事，而係港大女生陳巧文示威舉動，佢俾保安人員熊抱後抬走，激烈程度媲美柔道、跆拳道或拳擊等奧運項目，買一張飛入場，睇足幾個項目總算值回票價。
轉車絕塵而去
觀眾留喺場內，就錯過咗另一啲精采場面，據在場人士講，陳巧文噚日被「紅牌」趕出場後，冇即時離開，坐喺馬術比賽場入口休息。佢示威無功而還，冇乜心機再行動，不過保安人員仍然昅實佢一舉一動，因為政務司司長唐英年座駕，當時泊喺附近，有關人等恐防陳巧文再發難，所以唔敢鬆懈。
等咗一陣，掛上CS車牌嘅司長座駕突然開車，駛前幾十米再停低，冇耐另一架車駛到，車上乘客赫然就係唐唐，目擊者指唐唐落車後，匆匆轉車坐上自己座駕，隨即絕塵而去，其間回頭睇過陳巧文兩眼，好似好驚佢咁！
陳巧文弱質纖纖，唐唐又使乜驚到換車避走呀，呢個落荒而逃場面，好彩冇乜人睇到，否則真係失禮兼丟架，又話中國人站起來，香港高官對住一個示威人士都慌失失咁款，真係令人擰晒頭。
馬術賽仲要舉行多日，八方估計示威者唔會罷休，意味高官未來幾日仲有機會同佢哋碰頭，如果唔想閃閃縮縮鬆人，有關方面應該盡快制訂高官離場安排，免得再出現類似尷尬場面；其中一個方案，可以考慮安排高官易容走人，扮運動員恐防佢哋身形唔似易穿崩，扮工作人員又有失身份，馬術賽一切以馬為本，萬大事都要保住參賽馬匹安全，高官要安全脫身，唔使扮鬼，一於扮馬，八方相信一定可以輕易着草走人，保證絕無甩拖。
高官神色慌張，亦可能同恐襲陰影籠罩香港有關，已達杯弓蛇影程度，噚日有觀眾大意留低隨身物品喺穿梭巴士上或場內，工作人員都即時喝住叫觀眾拎番走，場內場外氣氛都頗為凝重，緊張過睇比賽。
mailto:[email protected]