睇無綫，周不時聽到楊思琦喺廣告大聲嗌：「你，高清咗未？」我京奧判官未，但噚日朝睇佢訪問失意女槍手杜麗時，都清楚睇見佢面色蒼白，同滿面青春粒粒標記嘅杜麗成絕配，睇呢一幕，唔知情者仲以為睇緊驚悚片；至於金牌司儀嘟嘟姐、「體育版譚玉瑛」韓毓霞同樣畀咗個「高清」樣大家睇，呢鋪真係唔慌唔「高清」囉！
本港兩大電視台對碰，從來都好似中、美男籃對陣──即係冇得打。無綫嘅優勢唔單止係慣性收視，最緊要當然係星多靚女多，上至熟女下至妙齡少女，幾時都咁養眼。無綫今次播京奧，係就係多靚女出場，但頭兩日節目好似有啲反效果、反高潮喎！
楊小姐嘅屋邨港姐形象一早入晒屋，不嬲成個鄰家女孩咁清純，但唔知係咪咁多年為咗拍戲慣晒生活顛倒，唔慣早起身，噚日朝打鑼咁早就要直擊訪問射擊項目嘅杜麗，面色蒼白加埋口腫面腫，真係我見猶憐，冇陰功！佢咁努力為無綫做嘢，達到宣傳「高清」效果，我係佢老細一定加佢人工。
楊思琦韓毓霞嚇親人
話晒佢都仲算係後生細女，冇大騷經驗都講得過去，但資深嘅同樣見光死！我哋娛樂版同事，噚日已經報道過嘟嘟姐喺鳥巢做開幕騷時有幾失控，喺呢度唔重複，而唔知佢係因為個妝化得差，抑或有其他原因，出鏡時個樣真係怪怪哋。佢哋兩個都未算誇張，做過無數大賽、做體育大騷做到出晒名嘅韓小姐，噚日朝出鏡時居然披頭散髮，個樣夠殘，唔通呢啲就係「光輝的印記」？