近日香港不停打風，原來球壇都有股龍捲「瘋」。英超新特蘭嘅領隊堅尼，率先「賴嘢」癲咗，喺轉會市場見人就買；而最近呢個「瘋」球吹咗去西甲，今次主角係馬德里體育會嘅教練艾古亞。馬體會要打歐聯，但周五先有雷恩斯外借賓菲加，再傳出佢哋會放科蘭去熱刺，艾古亞瘋了！
第一步：放雷恩斯
馬體會上季喺西甲攞第4，今年有份打歐聯，佢哋嚟緊下周三就喺外圍賽第3圈作客史浩克04。艾古亞為咗加強實力，加入好球員實在正常不過，於是季前分別簽入後衞烏化奴斯、希汀加、前鋒龐高尼及門將哥柏，希望能夠殺入歐聯分組賽。
之不過，近期球壇不停打「瘋」，馬體會教頭艾古亞就終於「賴嘢」。周五佢竟然將曾經幫皇馬同阿仙奴攞過西甲、英超冠軍嘅雷恩斯，外借至葡超球會賓菲加；後備席寧願留用甘馬曹同米基爾古華斯等小將，都懵到唔要雷恩斯。
第二步：賣埋科蘭
冇一個雷恩斯算喇，點知日前又傳出佢哋會以1,800萬鎊（約2.7億港元）賣烏拉圭前鋒科蘭去熱刺，唔係打歐聯先嚟話套現呀嘛？睇番馬體會喺歐聯第3圈嘅球員註冊名單，4名前鋒分別只得阿古路、科蘭、龐高尼同魯賓拉莫斯；但係阿古路打緊奧運冇得踢，冇埋科蘭仲得了？死喇，死喇，呢股龍捲「瘋」好惡！
唔知陣「瘋」吹完去西甲之後，係咪又再吹返去英超，令到一向好鬼冷靜嘅熱刺領隊拉莫斯，都開始癲埋一份。有傳話佢覺得科蘭曾經效力過曼聯，如果得到佢嘅加盟，可以對紅魔時做超級秘密武器喎！唉，個個教頭都好似撞晒邪咁，希望呢個「瘋」球快啲走啦。