奧運會呢啲國際盛事，場內健兒施展渾身解數出賽固然精采百出，場外風光其實都幾有睇頭。台灣富豪郭台銘日前抵達北京，觀看開幕儀式兼睇比賽，佢係VIP，有關方面自然招呼周到，喺場外亦係焦點之一，每當同新婚妻子曾馨瑩喺會場附近出現時，例必引來唔少人要求簽名同合照，魅力直逼明星，風頭甚勁。
陳祖澤匆匆返港
香港富豪近日亦雲集北京，好彩領導人大把嘢做，冇特別召見佢哋，各人可輕輕鬆鬆睇比賽。賭王一家人各有所好，噚日下晝，賭王、四太同超雲一齊出動，有關方面安排佢哋坐專車直達場館，冇透露睇邊個項目，據了解賭王家族會留喺北京一段時間，冇咁快返香港。
馬會主席陳祖澤就唔同嘞，噚日下晝匆匆返港，因為香港協辦馬術賽，馬會出錢出力幫忙，陳祖澤算係半個主人家，梗係要回港坐鎮，佢大讚前晚開幕儀式十分精采，表演項目令人嘆為觀止，李寧「飛天」燃點聖火更係一絕，佢話直情拍爛手掌。