我醫神鍾意飲番一兩杯，但就好鬼易醉囉，尤其係飲香檳，唔覺唔覺就醉咗。唉，好多上班族都因為要應酬或者減壓，放工去飲番兩杯，有時失控飲多咗醉倒人前就唔好啦，究竟飲幾多至安全？點樣飲至唔傷身？大家要記住一個好重要嘅指標：每個禮拜留番兩日做「無酒精日」，俾自己清醒吓。
衞生署上年做咗個調查，原來香港大約有一成男人，每星期都飲酒四日或以上，女士就大約有2%經常飲酒。
個個酒鬼都唔認自己飲得多，「我無醉……我無醉」，原來有方法測試吓自己係咪酒鬼，衞生署男士健康網站入面有10條問題，問你飲酒嘅頻密程度、食飯嘅時候係咪飲多過食、係咪經常要飲到爛醉如泥先覺得痛快、有無飲到失憶、或者唔飲酒會手震等等，如果10題入面有2條或以上答「係」呢，你就要停止飲酒3日嘞，如果做唔到，就要搵專業人士求助。
俾個肝休養生息
美酒淺嚐，所以每次飲唔好超過三、四杯，啤酒大約含5%酒精，紅酒同白酒就有10至15%，呢排興番飲嘅威士忌，有成30至40%酒精，加冰或加水可以冲淡啲，香檳呢類有氣嘅酒容易俾身體吸收，所以特別容易醉。一邊食嘢一邊飲可以減慢酒精吸收，大忌空肚飲、豪飲或者鬥酒，酒精同非酒精飲品隔住飲，都可減少飲酒嘅慾望，如果真係飲到爛醉，事後就要最少兩日不沾酒，俾個肝休養生息，記住，飲酒非玩命，唔好飲咁多。
blog主：醫神