轆Book：渡海豪情　12門徒甩到黐肺

「勁呀！勁呀！隻手仲震緊……」（下省幾十字）「過彎嗰陣，一大陣煙冚埋嚟，好犀利……」（下省幾十字）「再快啲就好……（行幾多？）……爆晒錶喇！……」（下省幾十字，不過係俾人鬧嘅）。
8月2、3號由TypeRClub獨家請讀者到珠海玩700匹甩尾，由賽車場常客James、Ray操刀，搞到人人𠵱嘩鬼叫。

記者：梁美甜
協力：徐影龍
攝影：陳盛臣
鳴謝：TypeRClub

甩尾連環圖

飄移指嘅係控制得到嘅甩尾，穩定咁篩唔係人人得，不過呢勻個個圈都得。

■並排而行，速度過180km/h

■入彎即甩

■駕回直線，加速

■Bye-bye！

甩到黐肺

今次12個人連埋攝影師，認真啲講係13豪情至真，原定計劃係每人坐兩轉，第一轉係試坐以TimeAttack、玩速度嘅房車，緊接就係玩Drift、玩甩尾，至於坐咩車，早就打鑼打鼓話晒畀全世界知係由280匹改到有700匹嘅Supra，單係聽就已經知犀利，正如其中一位讀者Martin話齋：「難得機會，莫講話坐，聽吓引擎聲，聞吓電油味都抵！」
聽佢哋講吓今次落Track幾興奮幾刺激喇！

■全場最受歡迎，就梗係四位RacingGirl喇。

■電影就有《12瞞徒》，我哋就有12豪情，仲係份外灑熱汗嗰隻！

面青青熟男Kendel

Kendel今次超Luck，喺六百幾封信入面可以抽到同女朋友Wincy一齊甩，勢估唔到女友玩完超High，Kendel恰恰相反，臉超青兼謝晒，問感受，反應係：笑住點頭！超可愛。

■Wincy：好玩！好玩！唔係好暈啫！（係同我講定係同Kendel講先！）

知己老友FaiFai阿Ling

阿Ling係全場最鍾意避鏡頭嗰個，難得影到未戴頭盔滑稽樣都係多得老友FaiFai啫。
Fai：平日有睇開日本飄移比賽，今次坐James揸Supra，實實在在Feel到臨場嗰份壓迫感同張力，見到James純熟咁運用ClutchKick、E-brake同Feint，正！
Ling：玩Drift嗰陣坐Ray部車，搞到我不時留意前面James部車，每次喺彎甩完就要避陣白煙同彈埋嚟嘅胎屎，最享受嘅係每次俾篩出去嗰下，好正！

■左：Fai；右：Ling

學生車神Wayne

Wayne係眾人中年紀最細，仲喺外國讀緊汽車工程，當日未見過佢停過，甫落車感受，Wayne手震口震咁話：「OK喇，同以前玩嘅差唔多！」唔係嘛？定一定心神才吐真言：「上車其實非常緊張，扣安全帶一刻覺得好似同部車連埋一齊，我諗700匹入面只係用咗300匹未夠，已經狂野得嚇人，強！」Drift呢？「改裝後車架硬淨，James好犀利，技術好得無話可說，入彎四平八穩，超過癮！」睇得出，邊撲向James合照邊答我，搞笑。

三老友事前吱喳事後噤

Martin、阿和、阿峰好老友，老友到可以Share一間房㖭！三個對車好熱誠，認知亦強，試過同的士時輪住討論前面尾燈係咩車，死未！未試車就已經逐部數：「99年2JZ……呢款車尾燈係咁，唔似得……」咁志趣相投，唔怪得咁Friend喇！
三個人事前討論到興高采烈兼手舞足蹈，試完只係一致地：「好玩，篩得勁！」字都唔多隻，點解？原來係因為唔夠喉兼無得玩房車速度而少少失望，靜晒！

■左：Martin；右：峰

■阿和全程淡淡定，情緒最穩定。

慈父Danny代囝上場

甫見Danny已經表明寄信人係囝囝，可惜未足18歲，轉而要爸爸上，用Danny名投寄，結果中咗，本以為Danny被迫興趣不大，殊不知都係好奇寶寶，全程圍住James問個不停，試完車第一反應仲係最真嗰位：「正！無後悔（嚟）！」唔通之前曾經後悔過？

超級粉絲李奧

話李奧Leo係超級粉絲有原因，自己平時玩開車，甫見Ray就索料索不停，嚴如小學生般聽話兼勤力。
Leo：真係聽到每部車嘅呼吸聲、聞到場上煲燶「鮑魚」味、親近到RacingGirl、仲有人人身水身汗，「香」味四處嘅真實感，好開心。

未甩先興奮

撫心自問，只要係鍾意車嘅話，「隆……隆……」聽到呢啲震天咆哮，心跳絕對會不由自主咁加速，雙腳卻反而自動地跑到Track旁，甚至喺部車旁望真啲，最好就係摸吓㖭，方便嘅就研究吓都無妨！自己係咁，自然好明白當日12位大朋友似足甩繩馬騮跑勻全場，影足咁多部車嘅心情同行為。
TrackDay有成攝氏40幾度，烈日當空，未正式落場都已經熱到變水人，問心情就個個口是心非：「OK，少少興奮，唔係咁緊張啫！」甫上車趁其不備再問：「好緊張、好緊張……安全帶點扣……對手放邊好啲……」真係唔緊張？你話呢？