玖源集團（8042）啱啱派發既中期成績表，純利增長靚爆鏡，股價再跌要買。玖源主打BB肥，08年半年度（6月底止），純利就翻咗一番到3800萬銀（人仔．下同）。玖源上半年，受惠化肥產品提價，加埋集團進行技術改善，令到毛利及純利爆升。
要咁睇，環球糧價急升及祖國扶農政策刺激，化肥產品應該keep住高價。加埋玖源本身技術改進，所有利好因素，下半年應該不變。加埋嚟緊日子，玖源唔再受到春季雪災及5月四川大地震嘅影響，產銷量提升，08年全年度純利增長，應該仲爆炸。保守計數，玖源08年度純利增長，仍然係翻一番，上到8270萬銀，連埋配股攤薄效應計，預期PE都係11倍。
玖源250日線喺0.15元，股價再跌，吼實呢個位兜一番，以08年度15倍預期PE做目標，玖源要見0.24元，潛在回報係半番。
國中趁有勢炒一轉
國中（202）最新NAV約莫0.1元，股價1年跌足8成，現價（3.8仙）折讓64%，大把NAV空間墊底。又集團呢期啱啱發公告，話出售長沙土地項目，代價4.7億銀人仔，預計獲利2.4億銀人仔。雖則土地出售，仲有待EGM通過，但計計數，若果長沙土地成功出售，可以為國中每股變現2.5仙，每股獲利1.3仙，折合國中現價PE得2.9倍。趁國中有勢，呢轉短打，博升20%，國中股價見4.5仙，仲未有耐到NAV水位。