深海尋人　嚇鬼愛情片

深海尋人　嚇鬼愛情片

今周3區DVD新碟不多，揀咗徐克套《深海尋人》！這可說是徐克新嘗試，甚至有人話係大師回歸。女主角李心潔繼續她那入肉三分驚嚇本色，全套戲亦有不少驚心動魄場面，不過可能有唔少觀眾同筆者一樣，欣賞完電影之後會問：「究竟係驚嚇片定愛情片呀？」

記者：許福合

海難無頭屍

電影開宗明義就話香港人生活壓力大，100人就有9個有深淺不同精神病，甚至精神分裂，會見到平常人見不到的事物！話說李心潔飾演精神科醫生高靜，一次與男友國棟到海底古城潛水，不幸發生意外，高靜昏迷，國棟起初失蹤，隨後在附近發現一條無頭屍體，懷疑就係國棟本人。由於屍體未能經DNA證實身份，而高靜亦失去對事發前的記憶，因此發生經過無人知道，怪事亦由此而生。

■Simon撞鬼，似瘋似狂，惟有打支鎮靜劑。

■因為這石頭而引起對海底城遊覽興趣。

■片中出現不少海底情景，花了不少心機拍攝。

催眠後撞鬼

國棟點死？高靜是否兇手？這兩點就成為電影初段「疑點」！作為精神科醫生高靜，對精神本應較能掌握，不過隨住接受催眠及其病人Simon引導下親身見到鬼怪等異象，就開始可以當一部「鬼片」去睇！雖然鬼怪視覺效果都算不俗，不過要講認真嚇死人位置不多，可能係因為鬼怪設計得未夠得人驚吧！以筆者未算大的膽子去睇，最心寒之處，係高靜電梯撞鬼同要由冰箱取出人頭之時，真係有啲心驚㗎！

■意外原因成謎，小凱與高靜關係變差。

■同靈魂接觸，竟然會被火焚燒。

港版人鬼情未了

心水清觀眾可能會估到，一開始提到精神分裂，故事又怎會得個驚字咁簡單！當以為故事發展到尾聲，連國棟靈魂都走出來與高靜續未了情，更將凶靈魂魄送回家，以為睇完一套港版《人鬼情未了》之際，原來海底意外發生之後的一切都係高靜幻想！講真，有睇過李心潔舊作觀眾，估到這條橋嘅機會真係好大，所以都唔怕在此開估，不過之後發展就比較令人意外。開始將意外經過說清楚，更將電影氣氛由詭異轉成愛情片一樣，再加插哀怨的插曲。若然你一心想睇套鬼片，這個轉折可能就比較難接受！

■DV播到重要時刻，竟然變雪花。

心驚驚一刻

■靈堂內撞鬼，原來俗稱見「老闆」！

■小凱終於找回人頭，不過究竟屬於誰的呢？

■這一幕電梯撞鬼，都幾得人驚！

■問你咁仲食唔食得落？

■凶靈終於被感動，讓高靜帶佢回家。