零售Ｋ知道母校出咗一位會考十優生，非常高興，雖然已貴為證券集團主席，零售界翹楚，仍然覺得與有榮焉。人總係對母校有感情嘅，畢業後多年，仍然以母校成就為傲。左丁山知佢對助學好有興趣，於是乘機叫佢捐啲錢嚟獎勵吓啲後進，佢一口應承，叫左丁山有好介紹就搵佢。
零售Ｋ已經去咗北京參觀奧運，一家四口住在北京香港馬會會所。講起奧運開幕禮，入場券四張得來不易，價錢貴唔在講，最麻煩係兩年前與一班香港商界名人向倫敦一間具有商譽嘅體育推廣公司訂好門票，付咗訂金。點知到咗出票時間，倫敦公司話各方需求殷切，只能配給一張。零售Ｋ立即發律師信，經一番律師書信來往之後，先至能夠力保四張門券不失。計埋律師費，一張門券嘅價錢如何？唔敢諗。其他人與北京早有高層關係嘅，就唔使咁大陣仗就獲配門票。左丁山在北京時，人在馬會會所，站在大門口等人，竟然見到瑞士私人銀行家賓架Ｃ推門而入，一家四口、加上菲傭，話放假一個月，到北京觀賞奧運喎。賓架Ｃ租咗一間服務性住宅居住，帶家人到馬會會所食飯兼游水，實在一樂也，羨慕死左丁山。賓架Ｃ在大學比零售Ｋ低三屆，當年係四年制，兩人同系，佢係新鮮人之時，見過讀四年班嘅「大仙」零售Ｋ，今個月好有機會在北京馬會相逢。
零售Ｋ嘅大仔今秋入讀約翰霍普金斯大學，此大學百年來以醫科及工程科學聞名世界，由於入學不易，故此零售Ｋ非常開心，奧運之後就親自送子到巴提摩爾。不過諗起去美國，零售Ｋ就眉頭皺，皆因生意關係佢去過沙特阿拉伯幾次，每次入美國境，關員將佢嘅護照翻兩翻，就會對佢「另眼相看，特別招待」，喝令鬆皮帶，甩皮鞋，打開所有行李，逐件驗屍咁驗，令佢非常不爽，但又無可奈何。因而想起幾個月前一班銀行家團曾組旅行團到伊朗一遊，回來後大讚酒店魚子醬便宜兼美味，而出外旅遊雖然心情緊張，但不如外間傳媒報道得咁局勢嚴重。幾位心水清嘅賓架去伊朗之前，收埋澳洲、加拿大、英國護照唔用，一齊申領咗香港特區護照。入境伊朗時，入境VISA印在特區護照上，他日去美國旅行，就用番本外國護照，以免遇上零售Ｋ之麻煩。