無綫殿堂級主持鄭裕玲（嘟嘟），前晚與李克勤在北京鳥巢主持08奧運開幕禮前，畫面直播了嘟嘟發火鬧人「你又大聲啦」片段，以及克勤和韓毓霞整理衣服。怎料直播開幕式時，無綫又再度出錯，於完場後當成龍演唱時，無綫又播出嘟嘟的聲音說：「1234，1234，冇出街嘅呢啲呵？」以及克勤問工作人員：「我想知𠵱家呢啲係咪出緊街？」
場館熱爆除褸唞氣
直播時間多番出洋相，無綫外事部副總監曾醒明昨日在電話回應說：「係衞星訊號延誤，京港兩邊控制室喺溝通上嘅說話就唔覺意出咗街，以後會小心啲。」
克勤對於嘟嘟被指失控鬧人，昨日接受訪問時力撐說：「少少錯誤啫，嗰時都未正式開幕禮，係熱身時間，希望大家唔好咁話嘟姐啦，場館好嘈，我哋喺現場又戴咗headphone，所以我同嘟姐面對面對話，講嘢都要好大聲，好似嗌交一樣，咁你哋喺電視機咪以為嘟姐鬧人囉，其實唔係鬧人呀！我同佢嚴重澄清。」
蝦碌片段中，克勤忙於穿西裝，他指場館內很熱，令他汗流浹背，他又說：「由踏入場館一刻已經成身汗，由底濕番上面，每次唔使出鏡，我都除外套唞氣。」克勤表示節目完畢後，大家會開會檢討。
克勤對於奧運在祖國舉行，意義重大，他說：「我40歲人等呢一刻，今日呢個美夢喺中國實現，真係好感動，我仲帶晒國旗入去支持。」他指李寧飛天燃點火炬很難忘，他說：「主持呢個奧運節目，再熱再辛苦都係開心！」
顧紀筠熄燈防出醜
顧紀筠前晚替亞視主持完京奧開幕直播，昨日已返回亞視大埔錄影廠，對於嘟嘟出現蝦碌，顧紀筠說：「其實我哋坐得好近，廣告時間仲係咁影相。我唔能夠代表佢哋講嘢，不過我自己就熄咗支燈，公司如果想鏡頭見到我都要call我開番支燈先。」
採訪、攝影：葉雪、藍文浩