楊千嬅噚日以「喪運之星」身份到旺角出席「喪運會Do入朗豪場開幕禮」，佢即場試玩子彈遊戲車。噚日係北京奧運開幕大日子，不過千嬅有工作在身，唔可以睇電視直播開幕禮，佢話：「我有啲朋友都去咗北京睇奧運，佢哋話過關嘅時候好多人，希望成件事平平安安舉行。」
「腫到唔想撈」
另外，對於有雜誌話一向包包面嘅千嬅近日離奇瘦面，下巴尖尖，佢話自己冇乜特別消瘦，佢仲笑自己：「我上鏡依然都係咁肥，總之我每日做運動就唔會水腫，有一排我真係腫到好似唔想撈咁。」
「整容點都痛」
問千嬅會唔會擔心俾人話整容？佢笑笑口話：「我要整都去隆胸先啦，整容點都係痛㗎，隆咗胸就唔會出現離罩情況。將來我真係整，我反而希望個size可以着到36、38碼嘅衫。」