不論是《小時候》的叔叔，還是《變色龍》的鄺志立，潘志文的演出都叫人留下深刻印象。41年演藝生涯，他嘗盡甜酸苦辣：當年《變》劇拍攝他喪父的情節，剛巧潘父也同日病逝，卻被指炒作做宣傳；潘翁又踢爆爾冬陞常偕兩武師接余安安放工，令他不敢與安安拍咀戲。 撰文：戴彩煥
亞視早前重播78年經典之作《變色龍》，恍如時光隧道把觀眾帶到香港70年代。今日遊客絡繹不絕的星光大道，昔日一片荒蕪；還有當年仍在興建中的紅館和新世界中心，都是劇情以外的驚喜發現。
這天，58歲的潘志文（潘翁）重遊尖東，百般感慨。他說：「當年我好朋友羅石青（亞視前藝員、斑斑前男友）因病厭世，就係喺新世界中心停車場跳咗落嚟。」
《變色龍》不僅滿載香港人的集體回憶，更埋藏了潘翁一段鮮為人知的往事，他說：「拍《變色龍》吳回（潘翁劇中的父親）死嗰日，自己爸爸真係過咗身，嗰陣趕緊戲，如果告幾日假，真係好大影響，於是我哥哥將爸爸喪禮延遲多一個星期，拍完吳回嘅靈堂戲，跟住就到我爸爸出殯。點知有雜誌話我爸爸過身係假，係麗的嘅宣傳屎橋，邊有咁巧合！」
身為當家小生，不時有機會與靚花旦談談情親親嘴，艷福無邊，但潘翁卻自爆跟余安安初拍咀戲時不敢真咀，他說：「嗰時佢同爾冬陞拍拖，爾冬陞次次帶埋兩個武師接佢返工放工。余安安叫我真錫我都唔敢，怕俾人話鹹豬手。」
爆導演打路家敏
問到當年與路家敏一班小朋友合作《小時候》的趣事，潘翁說：「有時拍得夜，小敏眼瞓做唔到戲，導演單慧珠就會又呃又𠱁又罰，有時要小敏拍喊戲，佢真係會好大力咁打佢手板。」談往事，潘翁如數家珍滔滔不絕，譬如跟馮淬帆、汪明荃拍《私戀》期間，火爆的馮淬帆在餐廳用砂糖潑洋人，無綫即時將他炒魷，要潘翁兼做馮淬帆替身。潘翁說：「《武則天》同馮寶寶合作，拍得幾開心，又有武俠巨星劉永，我梗係操到行。點知拍拍吓搵唔到劉永，原來佢走咗去台灣斬戴良純，結果換咗曾偉權，上一個鏡頭劉永一跳跳咗上山，跟住跳番落嚟就變咗曾偉權，然後打字幕話畀觀眾知換咗人。」
人蛇扮臨記入境
80年的《大地恩情》，最令潘翁深刻難忘，他說：「當年我哋喺流浮山白泥搭咗成條村拍，嗰度好多偷渡客上岸，曾經試過有偷渡客偷咗茄喱啡啲衫冒充茄喱啡，仲上埋外景車出市區，但我哋個個知道都冇出聲。」
潘翁性格隨和，演出多年不曾有過不快經歷，除了兩年前拍亞視的《義無反顧》，他說：「因為有人好鍾意改劇本，將我啲戲cut晒，變咗我條線冇咗。不過我做呢行咁多年，勝在聽話冇乜架子，有時知道嘈嚟冇用，不如算數，求其你畀足錢我咪走。」雖然潘翁未有指名道姓，但不難聯想到當日被傳霸道、經常改劇本的葉德嫻。
潘翁移民加國後，偶爾為當地電視台和電台做節目，遇上合適劇本，他會返港一過戲癮。他今次返港，便是參與鄧特希監製的亞視重頭劇《法網群英》。問到何時退休？潘翁笑說：「從來冇諗過。」
