萬眾期待嘅北京奧運今日開幕。華華聽到，作為中國第一本土運動品牌、啱啱喺噚日夠18歲嘅李寧（2331），有意同國際動作巨星李連杰合作，推出全新運動服系列。市場人士話件事搞得七七八八，一去馬就可以火速推出咁話。
據講，呢個運動服系列嘅特點係sell中國功夫，同李寧做開嘅市場唔同，所以唔驚會自己打自己，亦都係因為呢個原因，所以公司先至選擇同李連杰合作。華華都好認同，因為又要好打又要有知名度，李連杰真係啱晒嘴形。
華華就「雙李」合作同李寧發言人傾過，佢哋話暫時未獲悉此事。李寧啱啱宣佈攞咗個Lotto嘅20年經營權，又傳想推出一個新品牌，出得咁密，唔知係咪想借今年爆晒燈嘅運動氣氛，谷一谷個品牌呢？