昨日大市上升動力不足，先升後回，成交金額有所增加，反映獲利盤趁反彈紛紛離場，嘉賓指美股連升兩日，港股卻只有100點左右的升幅，似有洗倉盤迹象，後市有機會反幅下試20000點。
郭：敦沛金融投資研究部主管郭家耀
于：瑞士銀行執行董事于正人
楊：主持楊慧玲
楊：恒指升幅收窄，會唔會係有獲利盤出現，見大市反彈走一轉呢？
郭：大市表現的確幾令人失望，我覺得個別股份甚至有洗倉盤出現，第三季大市對中期業績嘅憧憬都慢慢消退，加上市場憂慮大市將跟隨外圍下跌，喺整體大市氣氛唔太理想之下，恒指短期好有機會跌穿20000點。
于：成交活躍都係因為好多人早上憧憬全日市況會造好，而買入認購證，不過港股會唔會繼續升，短期都要睇番外圍因素，因為近期港股都係跟隨美股走勢。
搶先貼股
東方海外彈見32蚊要走
劉先生：我今日（周四）買咗東方海外（316），29.1蚊買入，想問近日油價跌咗，對呢隻股份有無幫助。同埋佢由40蚊高位已跌咗好多，睇吓佢會唔會喺超賣之後，有強力反彈。
郭：東方海外出咗業績後，都比上星期四個價跌咗好多。你買入個價同今日收巿價都差唔多，想博短線反彈係有機會，但就要定止蝕位。大方向我都唔睇好公司前景，所以可定止蝕位喺28.5蚊，反彈到32蚊左右，見好就要走。佢舊年因為有特殊收益，令派息相對比較高啲，但今年派息就好難維持咁高，唔好期望短期上得番40蚊。
中鋁短期難重上10蚊
aa仔：我喺14蚊買咗中鋁（2600），但之後傳出好多壞消息，又發盈警，中長線有冇機會重上10蚊樓上?
郭：首先中鋁最近出咗盈警，所以短期內買認購證風險就會好大。如果想等佢上番10蚊樓上，就要等佢出埋下半年業績先有啲機會。最近電解鋁廠冇電到，就開唔到工，咁佢哋就惟有買氧化鋁。暫時都幾難解決呢個困局，首先要等電力不足嘅問題解決，不過要等奧運過後，因為國家要擔保奧運期間唔會缺電，叫咗部份電解鋁廠關閉先，所以要去到第四季啲業績先會好睇番啲。
收市後4:30pm
click入 http://finance.appledaily.com以webcam參與節目及收看
歡迎phonein28698262暢談心得亦可email至mailto:[email protected]搶先貼股
