小藍呢排都好唔得閒，啲影音展覽真係一浪接一浪，想睇最高檔嘅影音產品，一定唔可以錯過今日開鑼嘅高級視聽展，幾靚幾貴嘅產品都有。但想掃吓平貨就要等到8月22日，一連四日喺灣仔會展舉行嘅香港電腦通訊節。小藍噚日搵咗電腦商會會長Jacky，問吓今屆通訊節有乜嘢「筍盤」。
Jacky話，其中一個益街訪嘅活動係一折底價IT產品拍賣會，大會搜羅咗𠵱家最Hit嘅60款高清影音產品、手機等每日喺會場拍賣，預計會以原價七折成交，好似有樂聲牌藍光播放機、Eight高清機頂盒、HTCTouchDiamond智能手機、NokiaN78手機等。
每日百件筍嘢益街坊
Jacky仲話，大會又揀咗10款最物超所值嘅產品，部份低至四折起發售，好似ThomsonPJX500A投影機，原價2,480元，會場賣999元，減幅達60%，每日限售20套；東芝2GBSD記憶卡，原價79蚊，特價49蚊，減幅40%，每日限售100件。其他超筍嘅產品仲有新力嘅MP3半價賣240元；中天手機六折賣599元；聯想Notebook八折賣3,999元等，真係手快有手慢冇。
逢周五刊出