潮語新解，「雞」呢個字今日已係「好水皮、好流、好寸」之意，而「你唔好雞我」則解為「你唔好寸我」。110米欄世界紀錄保持者羅布斯（DayronRobles），係劉翔今屆奧運頭號大敵，應該冇人敢「雞」佢，但事實係佢好「雞」，皆因佢有一對「鬥雞眼」。
8月13號晚上，京奧110米欄決賽將會上演，假如毫無意外，中國「欄王」劉翔會以衞冕身份，迎戰6月刷新世績的古巴跑手羅布斯。雖然羅布斯肌肉結實雄厚，身形健碩；但每次佢參加比賽，都會戴副眼鏡，霎時變得官仔骨骨，食正近年嘅「俏美男」潮流。
戴眼鏡上陣掩耳盜鈴
然而，呢名古巴人並非追潮流先戴眼鏡，而係要分散觀眾注意力，為一對「鬥雞眼」添上「點綴」，掩人耳目又或是掩耳盜鈴，費事人哋「雞」佢對鬥雞眼嘛。據講，真正「鬥雞眼」嘅人其實只係用一隻眼睇嘢，求大俠估計羅布斯應該唔算好「雞」，否則很難造出超人成績。
窒劉翔壓力大要輔導
1米92嘅羅布斯周四已抵京作最後調整，而西班牙《阿斯報》就報道，佢之前已喺西班牙訓練基地瓜達拉哈拉，苦練咗幾個月，目的只有一個：再破世界紀錄。羅布斯對該報話：「我工作係想讓自己快樂，唔係想破壞別人歡樂；我知道劉翔壓力好大，𠵱家生活成惶成恐，佢需要心理輔導。」
劉翔係自從受傷後已喺正式賽事銷聲匿迹，而到目前為止仍然閉關潛修，「劉欄王」神秘得有如黑夜之神蝙蝠俠，惟「失蹤」唔代表缺乏自信，相信110米欄決賽之後，就知道邊個「雞」邊個？