呢次西班牙之旅，為試盡新車性能，跑馬路不在話下，連迂迴凹凸不平山路，我都要踩番幾轉。連踩幾粒鐘，好疲，Takeabreak，泊好車後，居然見到對年老夫婦，喺條疑似溪澗嘅地方釣魚，好驚嚇！釣魚唔驚嚇，嚇人嘅係條河，河水居然超級混濁，坦白講，都係第一次喺外國見到條咁深色嘅河，或者綠藻多喇，再望一望公公，好爆笑，居然戴住頂墨西哥大帽，呢度係西班牙喎！
公公釣緊魚，婆婆呢？或者我眼神太過放肆喇，見我睥住佢老公，婆婆即時向我投以狐疑兼具戒心嘅目光，我稍為向前行多步，婆婆又作勢向我行多步，慌死我對佢哋不利咁，或者婆婆唔想有人打擾老公雅興啦。諗真啲，呢份閒情逸致，呢種悠閒生活過，其實真係幾令人羨慕，夫妻白頭到老享受餘生，相信係絕大部份人夢想，到𠵱家諗番起，都Feel到嗰份幸福，不過現實係殘酷嘅，唔使做齋釣魚過日辰吖，除非中六合彩啦。（四之四）
記者：梁美甜