星期一打開《蘋果日報》一睇，A27奧運專版講「奧運帶旺京城舊區，鑽進胡同掘金」，講南鑼鼓巷，附有圖片，十分有趣。咦，睇真啲，記者陳培敏筆下之小辮子正是左丁山與林超人、林靚太、食家薛、人類Ｃ喺上星期六晚在北京碰到嗰位老兄。當晚我哋成班人吃過早飯後，晚上九點左右坐車到南鑼鼓巷自由行，行行吓，成班人散收收，我哋五人不約而同畀一間小店嘅Ｔ恤吸引住，駐足而觀。食家薛嘅普通話最好，與北京人無甚分別，問左丁山：「呢件Ｔ恤上有兩個字，拆哪，你識唔識讀？」左丁山讀成「猜拿」，食家薛笑言：「就係同China發音差唔多，語帶雙關，幾幽默！」
於是行入去睇吓，有兩款水壺幾得意，黑色嘅（見《蘋果日報》圖片）與紅色Ｔ恤（上書「與食巨近」），於是請食家薛講價，點知呢位老兄大大聲講：「你們到歐洲旅行買東西，到美國買東西，講不講價？怎麼中國人在中國買東西，偏要講價？我是不故意漲價，訂了價，決不減價。」大家一言一語，擾攘幾分鐘，還是跟他買下了兩件Ｔ恤，一個黑水壺，共四百四十四元人民幣，想落都幾貴。不過呢位自稱「小辮兒」的過客甚有性格，講「BetterDrinkthanDead!BetterTravelthanDead!」，自言剛與香港一位單車手自新疆踏單車到西藏旅行，說話好有型有款，據佢解釋，北京現時流行講「巨好」（我哋講勁好），「巨近」（我哋講超近）。林靚太聽到入神，又幫襯佢買多兩件老毛頭Ｔ恤。
買完想話到過客（PassBy）酒吧飲杯啤酒，點知全店滿座，於是繼續行，成條南鑼鼓巷巨長，食家薛話一直可以行到「後海」，於是不如在一間小酒吧坐低，呢間吧不夠三百平方呎咁大，人類C（佢讀人類學）話見到有位似乎十歲不到嘅小女孩幫手執拾，於是左問右問卒之問到呢間係家庭式酒吧，租民居客飯廳經營酒吧，月租一萬五千人民幣，業主就肥咯，每個月收租，可以退休啦。巷內人來人往，不少係洋人遊客與年青男女，與香港蘭桂坊蘇豪一帶相似。這裏奧運變成「噢，暈！」，「8月8日忌運動」，遊客還以為是一國兩制嘅特區。