謝婷婷和林嘉欣等人前晚出席ChristianDior派對，被胞兄謝霆鋒反對入行的婷婷，特別找來父親謝賢撐場，更表示會戒蒲唔媾仔，看來加入娛樂圈的心意十分堅定。林嘉欣則不小心踢爆好友鄭中基一直刻意隱藏的「愛的紋身」，即時喊驚。
國際品牌ChristianDior前晚在中環舉行彩妝攝影展派對，獲多位有份參與製作的明星及模特兒現身撐場，包括謝婷婷、林嘉欣、胡兵、鄧愛嘉、MandyLieu及黃婉伶（Race）等。
「鍾意喺屋企睇書」
謝婷婷特別找來爹哋謝賢撐場，她笑言自己的造型照很像母親狄波拉。提到婷婷決意加入娛樂圈但家人不太贊成，胞兄謝霆鋒還揚言想她「仆」，她說：「唔嬲，哥哥撞好多，不過媽咪話女仔唔可以撞咁多，哥哥咁教有佢原因。」
提到入行後會成為追訪焦點，婷婷表示會「戒蒲」，她說：「其實我返嚟之後都好少蒲，之後都唔會去咁多，諗起覺得自己細個成日去好儍，𠵱家鍾意喺屋企睇書，好似哥哥咁，喺屋企打機。」之前婷婷經常被拍到跟不同男性朋友約會，她澄清說：「剛剛影到嗰個唔係我男友，係朋友，我男朋友叫Drafus，雖然最近好少聯絡，但係我仲好關心佢，男友只係得佢一個。」
至於林嘉欣則表示花了七小時完成化妝師設計的紋身彩妝，但現實生活中從未想過紋身，她說：「冇勇氣，紋身會上癮，好似穿耳環同鼻環咁，上癮嘅嘢都唔想試。」
談到愛的紋身，嘉欣竟不小心踢爆鄭中基手臂有紋身，她說：「我未遇過咁大衝動，如果係都會紋喺隱藏嘅地方，我知鄭中基隻手同條頸都有紋身，條頸係好似個墳墓咁有個十字。」
胡兵懶理陳澤民
有記者指鄭中基從未提及手臂上有紋身，一直有傳鄭中基手臂上的紋身是其女友蔡卓妍（阿Sa）的名字，平日更以長袖衫遮掩，嘉欣驚覺自己講錯說話，她尷尬地說：「我唔知呀！我係發夢見到，可能係我眼花，幻覺，Oh！sorry！好驚！」
此外，胡兵今次專程來港一天出席活動，他表示沒時間探望好朋友陳澤民（陳冠希父親），對於好友擔任董事的一間海外註冊公司遭入稟追討逾千萬元，他說：「我唔知，你哋講先知，我成年喺日本學英文日文，連爹哋媽咪都一年冇見，所以好嘢先好記得我，傳我識女仔係好嘢，男仔就會俾爹哋媽咪鬧死。」
採訪：楊潔雯 攝影：陳慧安
