黎諾懿和姚子羚由03年出道合作至今，默契十足，稱得上是好拍檔，兩人私下更是好朋友。但基於不與圈中人拍拖的信念下，姚子羚稱絕不會戀上黎諾懿。
黎諾懿和姚子羚從《當四葉草碰上劍尖時》開始，直到《甜言蜜語》，一直合作無間，螢幕上當然成為一對好拍檔，私下更是好朋友。緋聞這兩個字一直未有在姚子羚和黎諾懿身上出現，他們異口同聲表示：「我哋都唔會揀圈中人做另一半。」
「我哋太熟啦」
姚子羚笑說：「我哋真係太熟啦，而且我覺得如果同圈中人拍拖，忙起上嚟真係未必有時間見，最慘係拍親熱戲，如果我見到男朋友同其他人拍親熱戲，我怕會呷醋，所以都係圈外人好啲。」黎諾懿說：「我一向都好着重溝通，開心同唔開心都鍾意攤出嚟講，而且我覺得同圈外人拍拖，好似會多啲話題，衝突都會少啲啦。」
雖然姚子羚和黎諾懿斬釘截鐵表示絕不會過電，談到再合作，黎諾懿笑笑口說：「其實我哋都合作咗好多部劇，做情侶同朋友都試過好多次，不如下次試吓佢做我阿媽，我諗都會幾型。」姚子羚出奇地估到黎諾懿的答案，她笑說：「唔使問諾懿，梗係話叫我做佢阿媽啦，我估到佢一定會咁講。」可見他們心有靈犀。
「好男人難搵」
入行多年的黎諾懿，緋聞不多，話題大多圍繞工作，他說：「其實我都有好多女性朋友，不過可能我一向分得開，我會好專心去做我嘅工作，朋友就係朋友。我對愛情嘅睇法亦好簡單同低調，我唔介意俾人知，好同唔好都會同女友分享，盡量令佢開心。」
姚子羚則說：「我比較鍾意啲男仔有事業心同上進，仲要識得照顧同體諒對方，呢啲好男人真係好難搵㗎。不過我唔擔心，我成日覺得有好多嘢都係整定，隨緣啦！」
採訪：何慧斯 攝影：仇志德
場地提供：奧海城
黎諾懿服裝提供：KINGnROSEZ