全民熱爆奧運，有錢飛去北京，都仲要有本事搶到入場券；想參與毋須花錢花時間，Notebook在手，大把奧馬FlashGame畀你玩，由盛裝舞步到障礙賽甚至馬仔跳舞機乜都有，一個人玩到悶更可搵埋MSN老死隻揪，睇吓邊個先係網上馬神！
記者：徐影龍
障礙賽考你忍耐力
上網Serach「奧運馬術＋遊戲」，Show得最多就係Sina呢隻《ShowJumping》，好多Blog同網頁都爭住Link佢，原因好簡單，一個難字玩死你！四方向控制唔係用你嘅視點，前後左右行到亂晒大龍，仲要跑得咁上下速度先跨到欄，之後再急急腳搵下一個目標，順利完成一個賽事其實都幾有滿足感。雖則我經常炒出界，又頂唔順啲畫面，不過縱觀云云奧運FlashGame，咁似比賽嘅又真係少啲嘅，撐吓你啦！
網址： http://game.sina.com.hk/cgi-bin/fl/show.cgi?id=11793
巫斯義上身蹦蹦跳
馬會協辦馬術，官方網頁點會冇搞作？「香港馬運大共相」抄咗幾年前靠賣網頁Pixel嘅Concept，一張大相入面，每一格Pixel都隱含到訪者嘅資料，除騎師戰衣顏色、款色任你定外，仲可Upload自己貓樣扮巫斯義，Click出嚟隻馬仔仲識得蹦蹦跳，相當盞鬼。大海茫茫，單靠X、Y軸尋找自己都幾困難，好在有搜尋功能，得閒睇吓有冇朋友喺左近，又或失散咗嘅兄弟都OK！
留完到此一遊後，點都要試埋「GoHKGo」跳舞Game，簡簡單單Keyboard四方向掣玩晒，唔似街機《Beatmania》咁變態，輕輕鬆鬆玩到三點鐘。
網址： http://www.hkjc.org.cn/collage/big5/
奧運MiniGame集中營
奧運資訊爆炸，睇完都消化唔切，所以adidas個網只得小遊戲吸引到我。值得一讚係幾款MiniGames都可堪玩味，話易唔易、話難又不太難，試多幾次就掌握到技巧。遊戲類型包括乒乓球、女排、跳水、射擊同馬術，有信心仲可用MSN搵朋友鬥分，消磨時間一流。
馬會以可愛公仔引人玩，adidas就細緻認真得多，由眼耳口鼻髮型任揀任砌，似足MMORPG咁認真，我真係試過七拼八湊砌咗隔籬位同事個樣出嚟，像真度99.9%，只係唔方便登出嚟，Funny程度絕對爆晒燈。Set好晒後，便出現一個威猛運動員，漫畫掃描風格亦另有一番味道，我玩得最耐就係呢個，事關忍唔住將一班「好同事」逐個砌番出嚟！
網址： http://www.adidas2008.com.hk