黃伊汶（Emme）的歌唱事業一路走來不易，由初出道因父之名、背負已故「尖東之虎」黃俊女兒的身份，又從環球唱片轉會藝能，相隔四年才再度出碟，中間等多過做。反而她的愛情路簡單得多，說來說去也只得花弗仔余文樂一個，她說「愛情只係調味品、附屬品」，近日傳他倆五年情玩完，但輸了又如何？這虎女輕嘯一句「nothingtolose」，瀟灑得很。
黃伊汶入行七年，發展得最好是03年唱《戒男》一曲，翌年她再推出一隻唱片後，從環球唱片等待轉會藝能製作，又等待藝能開唱片部，如是者等足四年，今日她的新碟終於面世，連她也說：「之前啲人話《戒男》個勢咁好，點解唔做多啲？無奈嗰時唱片公司唔到我哋控制，人哋都唔會急於同你出唱片，都冇feel同你一隻接一隻，所以等咗好多時間。」
Emme是已故「尖東之虎」黃俊的女兒，有人說她投資做歌手有in冇out。不過她強調沒有自掏腰包出碟，一直由唱片公司負責投資，她說：「我揼嘅只係置裝費，冇做過亦冇試過揼錢做唱片。我一開始入行時，屋企人係有support置裝費，𠵱家大個咗，唔希望屋企人買衫買盛，自己會睇住條數，家陣買嘢起碼少咗四倍。」
「佢係familyman」
事事不計算也不愛與人計較的Emme，令大家覺得她在愛情路上付出的，肯定比緋聞男友余文樂多，對此她大笑說：「你哋覺得啫！我好識保護自己，有乜嘢事都會打定個底。我付出好多、唔開心乜嘢都好，一定唔會傷到我，好多嘢我唔介意試，nothingtolose，好似行娛樂圈呢條路順風定唔順風，人一世物一世，乜嘢都要試吓嘅。」
近日有傳Emme和樂仔五年情告終，她卻輕描淡寫地說：「感情嘢唔講，順其自然啦！我唔會講係同唔係，我覺得外間俾佢以前嘅報道影響咗，佢係正常人，唔係外間講到咁唔好，呢樣對佢好唔公平。佢花唔花弗？唔知喎，但佢係一個familyman。」問她感情生活如何？她則說：「感情生活只係一個附屬品，愛嚟開心之嘛，有人講過愛情只係調味品，你將愛情變成主呢，你就會冇咗自己。」
開騷險走光
此外，黃伊汶前晚在中環酒吧舉行了一場迷你音樂會，獲好友蔡一傑、張敬軒及關楚耀等撐場，勁歌熱舞期間她險些連貼身tubetop也滑下來，幸好她有雙重打底才不致走光。事後被問到余文樂為何未有現身捧場時，她說：「冇失望，我都冇請佢嚟，今次係公司代請嘉賓，為咗今次我瘦咗成十幾磅。」
採訪：朱倬誼、駱華齡 攝影：林德雄、陳志嵐
協力：黎敏茵 化妝：[email protected]
髮型：ChrisChau@Zingmakeupschool
服裝：RebeccaTaylor 場地：馬哥孛羅香港酒店