在北京南鑼鼓巷「過客」酒吧商店買咗一件黑色T恤，印上二○○八年八月八日，算係北京奧運會紀念品，今晚八時零八分，京奧開幕，相信各位讀者會齊集電視機前睇直播。大編輯等人獲招待，上星期六到北京，參觀鳥巢、水立方，看開幕綵排預演，佢話入場規矩有幾十個不准，但現場所見，入場市民照樣舉起手機攝錄、拍照，帶埋牛奶、清水入場，無人阻止。大編輯呢團人屬報界高層，有預演可睇，究竟睇到啲乜，大編輯話要保守秘密，八月八日晚自有分曉，她只能透露一句：非常張藝謀！睇過《英雄》、《黃金甲》嘅，會明白多啲，佢話坐在鳥巢「山頂」，方能完全欣賞場面之盛大，坐得低，就只能看到橫切面。
左丁山參加之北京團，住在北京香港賽馬會會所，位於金寶街，與金魚胡同接壤，出大門口向左轉直行約十五分鐘（約莫相等於由中環中心行到中國銀行大廈），就會到達王府井大街。北京之馬會會所，以四合院模式興建，總建築面積約三萬八千平方米，裝修美輪美奐，靚過香港馬會會所好多好多，沙田馬會會所與之相比，似係鄉下地方而已。我哋成班人，冇一個係總編輯，無緣參觀預演，但有事就要做。上星期五晚，編輯Y吃過晚飯就一路打電話，聽電話，非常緊張，幾乎係返咗報館督師咁嘅款。第二朝問佢香港有乜大事，佢話梁展文加入新世界中國做董事，好唔掂，香港會催生另一場政治風波。
星期一返工，先知道呢場風波真係逐漸形成，慢慢進展至成為三號風球，令特首辦趕緊發表聲明話會再探究其事。曾特首嘅民望已如浮雲，容乜易畀呢場梁展文風波吹散呀，乜單單都咁杰嘅？星期二碰到一位前朝官員，問佢如何解救。呢位官員話：「我在董老闆時期已經退休，未領教過曾老闆嘅作風，但聽番啲舊部屬舊同事講，曾老闆最近有啲煩躁浮躁喎。至於CM，我識佢，三年前佢將近退休之時，嘉亨灣事件一出，曾先生立即話要成立調查委員會查佢，跟住立法會又查，搞到CM雞毛鴨血，退休時，荷蘭水蓋都攞唔到一個。我諗，呢單嘢係CM計好晒數，在法理上無懈可擊，吼準政府無可奈何，先至投身地產集團嘅。CM呢次處於不敗地位，做唔做份工好閒啫，頭痕嘅係曾先生，唔係佢自己。」