已經轉戰內地嘅陳浩民，同佘詩曼拍拖接近六年，令人留低最深刻印象，莫過於當年佢哋嘅情慾電話外洩嗰件事，喺當年嚟講都轟動過一陣，𠵱家阿佘穩坐無綫花旦席位，而陳浩民就喺內地發展，早前佢接受有線娛樂台訪問，佢話轉戰內地係因為深信「魚唔過塘唔肥」呢句話。
內地掘金
陳浩民話：「唔可以唔承認喺內地發展嘅收入真係比香港電視台高好多。演藝圈變幻無常，你可以一夜成名，但都可以一夜失蹤，所以做藝人要識得喺你新鮮感未減褪嘅時候未雨綢繆，我喺事業上嘅抱負係好希望演技俾人認同，日後有人叫聲我『浩民哥』。」
感情空白
但係講到感情生活，浩民話𠵱家係一片空白，佢話：「曾經有過一段感情，當時我以為可以去到結婚階段，但竟然都可以無疾而終，因為咁樣，我對感情自然失去安全感，同埋，當你唔珍惜嘅時候就唔會覺得可惜。」有線主播衞志豪即時打蛇隨棍上問佢同阿佘嘅一段感情有冇得掹？浩民話：「我仍然等緊。」佢仲話佢同阿佘從來冇公開承認拍拖係基於大家都識得尊重對方喎！