早幾個月去德國試車，已經喺Audishop見到呢隻着晒專業賽車衫、坐住四環專車嘅熊公仔。係，係好鬼低能，但我當時真係好鬼妒忌，唔係嘛？Audi閒閒哋幾十萬一部，仲要同你呢隻熊仔度身訂做架迷你車？唔眼紅就假。今次西班牙之旅屬戶外活動，心諗唔會踏足Showroom，應該緣慳一面喇，估唔到依然有熊出沒，仲有埋私家SUV㖭。為證明乜都質得落，廠方預備多套Golfgear同手提行李，證明SUV載物載重量驚人，可惜現場無滑浪板咋，如果唔係，放三四面滑浪板都無問題。熊仔就負責揸住佢部私家車，繞場Showoff。
好多車迷都鍾意儲車仔，仲要揸邊款車就儲邊款模型車，將模型車放入真車車廂，好過癮！當日我見到唔少Q版Q5模型車，心諗買得起Q版都買唔起真車，齋儲？咪盞要拎住部模型車飛十幾個鐘帶返屋企，都係咪搞咯。誰不知試車完畢，大會為各傳媒預備一份紀念品，打開一睇，噓，正正係Q版Q5模型車，好彩自己無買啫，慳番。（四之三）
記者：梁美甜