職工盟立法會議員李卓人選情不妙，不過近日心情大好唔似太擔心，因為家有喜事，佢就讀瑪利諾修院學校嘅獨生女適之Justina，係今年會考9優女狀元，放榜後成家人去食自助餐慶祝，阿人搞工運就拿手啫，估唔到教女都咁叻。
阿人教出一個女狀元，咁日後搵工要搵職工盟，攞A就要搵李卓人嘞。阿人笑言無心得可言，今次真係要感謝神，因為自己工作繁忙，根本冇時間湊女，莫講話教女秘訣啦，「個女升中後未睇過佢啲功課。」個女成績好，全靠佢自己生性、自律，細細個就識編溫書時間表，又上網學英文，「我唯一做嘅，就係一得閒就陪佢玩，唔迫佢讀書。」
Justina媽媽鄧燕娥係職工盟總幹事，同阿人一樣，亦係一日忙都黑，佢話之前估計個女攞到四個A，有9A真係喜出望外。娥姐話一向冇嚴厲督促個女讀書，有時間都寧願陪個女玩，「我哋都冇乜時間陪佢，所以得閒都唔會迫佢溫書，一家人開開心心講吓笑仲好。」
囡囡9A意料之外
MaryknollConvent今年有兩個9優生，一文一理，Justina係文科最勁考生，佢同八方講，放榜前預計有3A3B，有9A係意料之外，同其他狀元差唔多，佢反對臨急抱佛腳，「我覺得要平日都勤力先得，如果只係考試前幾個月先溫書，冇可能有好好成績。」Justina讀書叻，課外活動都好活躍，小二開始學小提琴，考到第七級，又係學校辯論隊員，9月更會代表香港赴美參賽。
Justina話考慮拔尖入大學，希望讀傳理系，因為日後想做記者，亦可能報讀美國大學，佢坦言對搞工運或從政興趣不大，「兩樣都唔係我最想做嘅嘢。」阿人則話唔想個女做記者，因為成日見到記者跑新聞好辛苦，亦冇期望個女繼承衣鉢加入工會或參選，「走後門」做政治助理更加咪搞；娥姐則話對個女日後做乜冇意見，「未必要搞工運嘅，當然希望佢做啲對社會有貢獻嘅工作。」阿人兩公婆日忙夜忙，見記者多過見屋企人，八方思疑，Justina想做記者可能都係想多啲時間見到父母啫。
mailto:[email protected]