去日本餐廳食刺身，三文、吞拿係例牌必食；去酒樓，蒸東星、石斑就最新鮮，不過𠵱家星斑撈過界，殺入日本餐廳做刺身！開舖一星期的康元，係第一間有東星、皇帝星及泰星做刺身的日本餐廳，而且自設魚檔養住活魚，保證全部以野生、活魚做刺身！
記者：洪偉順
攝影：梁細權
星斑魚生片一試上癮
「目前只有我們，才有星斑刺身食，市面上也沒有一間日本餐廳，背後有一支9隻漁船的隊伍，為人客專程人手釣星斑。」王生拍晒心口講！以星斑做刺身的概念，源於王先生做開魚類批發，一班朋友都咁為食，一次喺東南亞食過星斑魚生片，鮮味令他一試上癮，索性自資建立船隊，在東馬來西亞捕釣野生海魚。因利乘便，星斑刺身就變成今日的康元的主打菜。入廚20年的大師傅Eddie，亦認為料理星斑肉難度甚高，皆因要刺身靚，放血過程好重要。星斑生猛，放血時會躍動，令血不能順利流出。星斑力度勁，劏魚時亦易弄穿魚膽，令刺身變苦。所有野生星斑都係馬來西亞空運到港，平均每條達到3-5斤重。
食蒸星斑大啖大啖魚肉，不過食刺身就要斯文細緻，而且要薄切。Eddie指出，星斑肉質透明，但較硬身，薄切最能食出原味，但亦考驗師傅刀工。此外，星斑刺身切片後要耐心等30分鐘，皆因星斑乃深海魚，脂肪豐厚，初切時脂肪未溶解，魚肉硬而無口感，但等待後軟滑香口。唔同星斑的食法都不同，東星蘸酸汁加葱食，皇帝星齋食可以，但泰星則擦油落鹽食最正。當中以東星質素最好、皇帝星次之，泰星第三，但反而皇帝星（在這裏叫馬拉皇魚）較罕有，其刺身賣最貴$180，不過採訪當日就無魚到港，可惜。
泰星刺身$150
用新式的日本做刺身方法，切好魚片，擦上白松露油，再磨上岩鹽，聞到已經有一陣微辛香味，等到魚脂溶解，入口軟綿，鮮魚味慢慢滲入舌頭。
東星刺身$150
比起泰星的肉，東星肉感多一點煙韌，亦有嚼感同埋鮮魚味，味道也較清新，所以蘸汁吃最適合，爽口惹味。
石鍋花蛤$68
韓式Crossover日式的簡單海鮮菜，廚師會喺客人面前把花蛤放入燒熱的石鍋中，開火爐，再慢慢倒入加有日本燒酒的清湯煮熱，要花蛤一開口就送到客人嘴邊，皆因此時肉最嫩，最鮮甜！
焗煮拖羅眼$168
用特製帶甜的醬汁煮30分鐘，再焗20分鐘，軟身，保持眼內的膠質豐富，味道淡甜。
燒明太子青椒仔$55
加咗少少創意的傳統日本菜，用青椒仔包住辣魚春（明太子），邊燒邊蘸汁食，咬落爽口微辣。
查詢：康元日本料理（28821926）
地址：銅鑼灣渣甸街50號渣甸中心11字樓