退休高官梁展文仕而優則商，但唔係個個高官離任後都熱衷下海，前環境運輸及工務局局長廖秀冬離開政府後，「過冷河」一年後唔急於重投商界，八方收到風，冬姑有新動向，可能喺9月出任香港大學校長資深顧問，負責協助港大參與四川重建同災區心理輔導工作。
四川百廢待興，重建隨時要十年八載，心靈重建工作更花時間，相信冬姑有排忙。
何永煊無意從商
另一退休高官、統計處前處長何永煊接受《公務員通訊》訪問時，自言淡泊名利、功名權勢，不在乎地位、權力或者貴賓式待遇，所以退休後無意從商，只係擔任香港傷健協會主席，及做國家統計局統計顧問。
何永煊係出身深水埗嘅上海小移民，做到高官佢話要感謝香港畀好多機會佢，所以退休後都希望以自己嘅知識、經驗同能力繼續回饋香港。何永煊喺老董年代炮製出港人內地出生子女高達167萬人呢個數字，係老董提請人大釋法嘅重要「理據」，今日睇番轉頭，何生對香港真係「貢獻」良多。