唔知大家仲記唔記得，4年前雅典奧運嘅體操計錯分事件呢？事緣係咁嘅，南韓選手金泰榮上屆喺男子個人全能賽事發揮平穩，本來可以首奪奧運金牌㖭㗎。最衰啲裁判誤將佢雙槓嘅起評分由10分當做9.9分，搞到計錯晒分，可憐嘅金泰榮由原本攞到嘅9.812分變咗做9.712分，最後得番個銅牌，個金牌眼白白送咗畀美國體操王子保羅咸姆㖭；金泰榮咁嘅遭遇真係聞者傷心，聽者流淚呀。
其實國際體操聯會之後都知道「賴咗嘢」，但又略嫌唔負責任咁話錯都無辦法，事關佢哋係唔會推翻裁判嘅判決；但已經將3個計錯分嘅裁判停咗職咁話喎。講真！即使你罰咗個3個判決終身停賽都無用啦！人哋金泰榮之前付出嘅努力，就係因為嗰3個裁判計錯分而白白浪費咗喇！好彩金泰榮後生，今年28歲嘅佢都仲會參加京奧咋。
上訴費助貧困國家選手
國際體操聯會咗避免同類情況再係大型體操賽事上出現，唔單止由06年開始，由一組裁判加到有兩組裁判，仲特設咗即場睇番錄影帶嘅措施，京奧都有得用㗎，不過每睇一次就要大拿拿500蚊美金（約3,900港元）畀國際體操聯會㗎喇。我諗金泰榮聽到呢個消息一定好開心，事關佢今屆唔使再驚因為計錯分而無咗個金牌，如果佢覺得計分上再有咩問題，就可以好豪氣咁現兜兜拎500蚊美金出嚟攞番個公道。
但係睇帶啫，使唔使咁貴呀？500蚊美金夠我求大俠租幾百套戲喇！但係諗真啲，呢500蚊美金其實真係抵畀㗎喎。你諗吓，500蚊美金可能可以攞得番運動員一生中最高嘅榮譽喎，而且上訴得直仲會回水㖭；即使上訴失敗，你咪當做善事囉，橫掂國際體操聯會都係用啲錢去幫一啲貧困國家運動員醫傷病咋嘛！