羅慧娟會喺下個禮拜二（12號），同拍拖10年嘅金融界才俊劉志敏，結束愛情長跑結婚。前晚呢位準新娘着住低胸露背衫襯短裙，到灣仔出席一間餐廳酒吧嘅開幕禮。好事近嘅娟妹成晚都春風滿面，但就唔係好覺眼佢手上有戴戒指。
依然口密
當現場傳媒上前恭喜娟妹嘅時候，佢先至露出甜蜜嘅笑容，不過佢對婚事就依然三緘其口，佢話：「未公開，我冇同傳媒講過，總之適當嘅時候先講適當嘅嘢，𠵱家心情好平靜。」不過娟妹嘅老友張衞健之前就露咗口風，話會返嚟飲娟妹嗰餐喜酒，娟妹聽到之後依然好口密咁話：「等我問吓佢先，總之適當時候就同大家講啦！」
問到羅慧娟婚後有乜嘢計劃？佢都係嗰句，話冇講過自己結婚，不過傳媒鍥而不捨，繼續追問佢生BB嘅問題，娟妹就笑笑口表示：「呢啲等上天決定，其實我𠵱家都有好多小朋友。總之會有專人話畀大家聽，今個禮拜會有公佈，只係我口中冇嘢可以講。」
問佢會唔會結完婚先至通知大家？娟妹衝口而出咁話：「咁又唔會！」跟住佢即刻掩住嘴甜笑，娟妹話自從結婚呢個消息傳開之後，大家仲開心過佢，佢話感受到大家都好錫佢，令佢好開心。