轆Book：霹靂藍火燄飆得起

由N年前《霹靂火》到近年《頭文字D》，戲入面喪飆狂爆鏡頭，幾乎統統都有三菱露筍份。無計，露筍價錢低但實力又拍得住超跑，報銷多幾部先夠一部歐洲跑車價錢，點止露筍，直頭超筍啦。新生LancerEvolutionX性能拍得住三百幾萬歐洲超跑，呢部霹靂藍火燄，絕對飆得起。

記者：梁美甜
攝影：譚盈傑
模特兒：Tiffany@TheGroup

首部TwinClutch

呢部十代露筍係代理行貨，亦係三菱首部採用TwinClutchSportsShiftTransmission雙離合器SST六前速半自動波箱車款，TwinClutch絕對係大勢所趨，配合輕量鋁合金車架，極速轉波有助提升性能兼減低耗油量。
抵港新車經過調校，馬力比原廠日版十代稍稍提升，由280匹增至295匹，扭力則稍微降低至37.3kgm，搭配結合ABS、ACD、AYC、ASC四個電子安全系統嘅四驅控制系統S-AWC（SuperAllWheelControl），一般崎嶇路面甚至山路都應付自如，高速入彎若遇特別狀況，會即時自行調整四輪動力分佈同煞車力度。車身剛性高，性能同安全性大大提高，一洗露筍過往易放難收形象，香港一般路面夠用有餘，係都要揸部露筍房跑當四驅車跑山而嫌唔夠力嘅話，我都無你符。十代新車有自動波箱，更迎合市場需要，女仔都揸得掂，唔使成日吊腳咁辛苦，露筍Fans只對棍仔情有獨鍾？無有怕，車廠亦同步推出棍波版本，不過就只有五前速版本。

囗2.0公升引擎容量唔算大，馬力卻媲美歐洲跑車。

囗十代露筍尾箱唔算細，放得落幾個手提行李。

囗至靚係車尾，好有衝動講：「見到尾燈算你贏。」

囗普遍跑車例有嘅吸風口，為狂飆提供足夠氧氣。

囗雙大尾喉，你信唔信佢係斯文車？

囗同RX-8好似嘅輪拱散熱氣孔。

囗新車外形設計較之前截然不同，斯文中見跑味。

囗鬼面罩同泵把設計稍有改動，實用而具型格。

升級變高性能豪房

見新車，第一時間坐入駕駛席，沿青山公路向屯門跑番轉，直路加速快而爽，正在無論坐司機隔籬或後座乘客，都唔會扽到甩肺，證明懸掛調校夠舒適，Recaro跑桶椅加18吋BBS輕量合金輪圈，高速轉彎、入彎循迹性高，可惜成程未試過深踏油門，唔盡興。
十代露筍有啲似RX-8，請留意輪拱上面嘅散熱氣孔設計，驟眼睇新車好有房車格，點解總係覺得佢好跑得呢？咪就係頭蓋、尾板、定風翼同雙氣喉作怪囉。裝備方面，十代亦較前代豪華，車身尺碼逼近中型房跑車，車身大咗，大大提升內櫳空間，就算大隻港男朱允崇坐後排都唔覺逼狹，嬌滴滴女仔？坐三個人都有位剩啦。

■TwinClutchSST操作易，轉波快。

■顯示屏連耗油資訊都有埋，唔使咁大力踩油，識收喇。

■懸掛經過調校，乘客唔會扽到暈。

■桶椅夠承托力，加速掟彎無有怕。

■新車Size大，造就內櫳充裕空間。

■中控台係簡約咗啲，以性能為主嘛。

■加速有力具推背感，出入彎利落。

LancerEvolutionX規格

售價：$539,900
引擎：1,998cc，直四渦輪增壓
馬力：295ps/6,500rpm
扭力：37.3kgm/3,500rpm
傳動：六前速半自動波，前置，四輪驅動
尺碼：4,495×1,810×1,480mm
查詢：環宇汽車（25200636）