民建聯劉江華帶隊出師新界東可謂諸事不利，先有鄉事派因為不滿民記強搶區議會議席，揚言封殺民建聯名單，隨時影響陳克勤選情，後來又被對手投訴涉嫌賄選，要主動上選舉事務處解畫，好似黑氣纏身咁款。雖然頭頭碰着黑，但陳克勤話唔太擔心，更話噱頭嘢陸續有來。對民記咁忠心，受黨力捧，原來佢自細就係民記擁躉，小學六年級時已經幫民記企街派單張，真正根正苗紅。
為穩定軍心，民記近日頻頻出招修補與鄉事關係，八方聽聞發叔月中外遊返港，會親自出馬到新西幫張學明拉票，而喺發叔出招前，部份鄉事派大佬做先頭部隊，其中大埔鄉事會主席文春輝，上星期致電個別聲言不滿民記鄉紳，語重心長話鄉親父老應該團結抗外，唔好自己人打自己人，否則犧牲張學明得不償失。