唔聲唔聲嚇你一驚，花旗股市前晚大幅抽升，之前跌咗幾日，個勢相當曳，相信唔少人被誘造淡，若然真係中咗招，恐怕痛苦仲未完，因為睇個款，花旗股市最少仲要挾多一浸。
受惠花旗股市急升，亞洲股市噚日普遍有好表現，港股就因為8號風球冇得炒，不過唔使失望，今日可能升得仲勁，淨係挾淡倉嘅力都唔得了。
建行C輪13527：建行（939）周二收6.73元，喺支持位守得幾穩，今日如果炒上可以試7元，升破7.20元就睇7.50元，買啲C輪13527短炒，隻輪現價46.5仙，有效槓桿6.3倍，正股升上7.50元，13527可見87仙，正股跌穿6.50元就沽咗隻輪止蝕。